Президенттік жастар кадр резервінің мүшелеріне Маңғыстау облысының мемлекеттік қызметінде өздерін сынап көру ұсынылды

Бүгін, 25 ақпанда ҚР Мемлекеттік қызмет істері агенттігінің Маңғыстау облысы бойынша департаменті мен Маңғыстау облысы әкімінің аппараты президенттік Жастар кадрлық резервіне алынған жастармен бейнебайланыс арқылы кездесу өткізді, деп хабарлайды Маңғыстау облысы әкімдігінің баспасөз қызметі.

2019 жылы Мемлекет басшысы Қасым-Жомарт Тоқаевтың бастамасымен республикамыздың түкпір-түкпіріндегі жалынды жас тар дың басын біріктірген жоба бастау алды.

Кадрлық резервті жасақтау үшін ауқымды жұмыс атқарылып, тек мықтылар ғана іріктеліп алынды. Президенттік жастар кадр резервіне еліміз бойынша 300 адам алынса, талаптар күшейтіліп, 2021 жылы осы резервшілер тізіміне тағы 50 адам енді.
Осы уақытқа дейін 350 адамның 209-ы мемлекеттік органдарда, квазимемлекеттік секторларда жұмыстарға шақырылып, орналастырылды.

Кездесуде Маңғыстау облысының жергілікті атқарушы органдарында жұмысқа орналасу, әрі қарай даму, әлеуетті қоғамдық маңызы бар жобалар үшін пайдалану туралы Маңғыстау облысы әкімі аппаратының басшысы Нұрлан Тәжібаев баяндады.

Резервшілердің де ой-пікірі тыңдалды. Павлодарлық Найла Алтайқызы Мұхтарова жергілікті атқарушы органдардағы бос орындар туралы ақпарат сұраса, шығыс қазақстандық Олжас Түсіпбекұлы Бейсенбаев аумақтық департамент пен облыс әкімдігіне ұйымдастырылған кездесу үшін алғысын білдірді.

Алдағы уақытта Президенттік жастар кадр резервіне енген тұлғалармен кездесулер тұрақты негізде жүзеге асырылатын болады.

• 28.02.2022
• 200