Ақтауда медициналық клиника салу жоспарлануда

26 ақпанда өңір басшысы Нұрлан Ноғаевтың төрағалығымен Маңғыстау облысында үдемелі индустриялық дамыту жөніндегі өңірлік үйлестіру кеңесінің отырысы өтті, деп хабарлайды облыс әкімінің баспасөз қызметі. 
 
Отырыста үш инвестициялық жоба қаралды. Атап айтқанда, жергілікті кәсіпкер Ақтау қаласынан 50 орындық медициналық орталық салуды ұсынды. Жобаның құны 1,2 млрд.теңге. Оның ішінде 255,6 млн. теңге-жеке қаражат болса, 944,4 млн.теңгесі- қарыз. Жобаны іске асыру өңір тұрғындарын сапалы медициналық қызметтермен қамтамасыз етуге мүмкіндік береді. Кәсіпкер клиникаға еліміздің басқа облыстарынан жоғары білікті мамандарды тартуды жоспарлап отыр. Нысан 2023 жылдың бірінші жартыжылдығында пайдалануға беріледі деп жоспарлануда. Нәтижесінде 67 адам тұрақты жұмысқа орналасады. 
 

Сондай-ақ, үйлестіру кеңесінде Ақтау қаласынан жылына 163 млн.дана жұмыртқа шығаратын құс фабрикасын салу жобасы ұсынылды. Жоба шеңберінде құс шаруашылығы кешенін, оның ішінде мекиен тауықтарды күтіп-бағуға арналған құс қоралары, балапандарды күтіп-бағуға арналған құс қоралары, құрама жем зауытын және қажетті инфрақұрылымы бар әкімшілік ғимаратын салу жоспарлануда. Жобаның құны 5,232 млрд.теңге. Оның ішінде 2,6 млрд.теңге - жеке меншікті қаражат, 2,6 млрд. теңге-қарыз. Нысанды 2023 жылдың бірінші жартыжылдығында пайдалануға беріледі деп жоспарлануда. Тұрақты жұмыспен 110 адам қамтылатын болады. Жоба іске асқан жағдайда өңір халқын қол жетімді баға мен жаңа өніммен қамтамасыз етуге мүмкіндік береді.
 
Жаңаөзен қаласының тағы бір кәсіпкері ет өңдеу және сою цехын салуды жоспарлап отыр. Жобаның негізгі мақсаты: жылқы, сиыр, қой етін өңдеу арқылы мал сою кешенін құру. Нысан сою пункті, тез мұздату камерасы, тоңазытқыш камера, жұмысшыларға арналған душ кабиналары бар бөлмелер, дәретхана және кеңсе бөлмелерінен тұрады. Сою пунктінің қуаттылығы бір ауысымда 3 000 кг құрайды.

- Жобаның құны 26,4 млн.теңге. Толық жеке қаражат есебінен салынады. Нысанды 2023 жылдың І тоқсанында пайдалануға беруді жоспарлап отырмыз. Жобаны іске асыру нәтижесінде жаңа жұмыс орындарын ашу, қоғамдық тамақтандыру, қайта өңдеушілер мен бөлшек сауда желісін жаңа ет өнімдерімен қамтамасыз етеміз деп ойлаймыз, - деді жоба авторы Марат Есболаев. 
 
Жиын соңында үйлестіру кеңесінің мүшелері ұсынған үш жоба да мақұлданды. Облыс әкімі Нұрлан Ноғаев іске асырылып жатқан жобаларға жергілікті атқарушы органдар тарапынан қажетті қолдау көрсетілетінін атап өтті. Басқосудың қорытындысы бойынша облыс әкімі жауапты тұлғаларға бірқатар нақты тапсырмалар берді.

• 28.02.2022
• 202