Нұрлан Ноғаев мемлекеттен субсидия алғысы келетін шаруаларға ауқымды түсіндіру жұмыстарын жүргізуді тапсырды

Бейнеу ауданында Нұрлан Ноғаевтың төрағалығымен өңірдің ауыл шаруашылығы саласын дамытуға арналған көшпелі жиын өтті, деп хабарлайды Маңғыстау облысы әкімінің баспасөз қызметі.

Аталған жиынға мемлекеттік органдардың басшылары, салаға жетекшілік ететін қалалар мен аудандар әкімдерінің орынбасарлары, ардагерлер, кәсіпкерлер және т. б. қатысты.
  
Екі сағатқа созылған отырыста ауыл шаруашылығына жауапты аудан және қала әкімдерінің орынбасарлары өткен жылы атқарылған жұмыстар туралы баяндама жасап, 2022 жылға жоспарланған іс-шаралар туралы баяндады.
  
Бүгінде мемлекет тарапынан мал шаруашылы, егін шаруашылығын, агроөнеркәсіптік кешендерін  қолдау мақсатында көптеген қолдау көрсетілуде.  

Биыл облыс бойынша мал шаруашылығы бағыты бойынша 579,7 млн. теңгеге субсидиялау жоспарланған. Қаржылай қолдаулар ауыл шаруашылығы жануарларының аналық мал басы азығының құнын арзандатуға, етті және етті-сүтті мал шаруашылығына, қой, етті-құс, жұмыртқа – құс шаруашылықтарына, бие сүтін өндіру мен қайта өңдеуге және түйе сүтін өндіру мен қайта өңдеуге бағытталған.

Егін шаруашылығы бойынша су беру қызметтерінің құнына,  тыңайтқыштар құнын субсидиялауға, акваөсіру өнімділігін және өнім сапасын арттыруды субсидиялауға қаржылық қолдау беріледі.

Инвестициялық субсидиялау бағыты бойынша                     Маңғыстауда агроөнеркәсіптік кешені инвестициялық жобаларын іске асыру жөніндегі Жол картасына 2022-2025 жылдарға арналған құны 139,5 млрд. теңгені құрайтын 19 инвестициялық жоба енгізілді. 

Оның ішінде 2022 жылға жалпы құны 2,4 млрд. теңгені  құрайтын 8 жоба іске асыру жоспарлануда. Нәтижесінде 201 жаңа жұмыс орын құрылады деп күтілуде.

Аймақ басшысы жауапты тұлғаларға ауыл шаруашылығы саласына мемлекет тарапынан көрсетіліп жатқан қаржылай қолдауларды шаруа қожалық иелеріне кеңінен түсіндірме жұмыстарын жүргізуді тапсырды. 

Облыста мал шаруашылығымен айналысатын 2 833 шаруа қожалығы және өсімдік шаруашылығы саласында жұмыс істейтін 145 шаруа қожалығы бар. Облыстық ауыл шаруашылығы басқармасының басшысы Қазыбек Ташимовтың айтуынша, ветеринария саласында бірқатар өзекті мәселелер бар. Саланың профилактикалық және диагностикалық жұмыс сапасын жақсарту үшін аймақ бойынша 47 ауылдық округке арнайы автокөлік пен компьютерлік құралдар сатып алу қажет.

Жиын қорытындысы бойынша өңір басшысы жауапты тұлғаларға бірқатар нақты тапсырма берді.

• 16.03.2022
• 196