ҚР Энергетика министрлігі: жанар-жағармай материалдары нарығын реформалау туралы

Бүгінгі таңда мұнай жеткізушілер мұнай өнімдерін соңғы сатушылар мен көтерме сауда жеткізушілеріне сатады. Бұл ретте көтерме сауда жеткізушілер ретінде меншік құқығында мұнай базалары бар тұлғалар ғана емес, жалдау құқығында мұнай базалары бар тұлғалар да әрекет етеді. Осыған байланысты көтерме жеткізушілерге қойылатын талаптарды қатайту бөлігінде мұнай өнімдерін өткізу кезінде тиімсіз делдалдарды алып тастауды көздейтін түзетулер әзірленді, - деп атап өтті ҚР Энергетика министрі Болат Ақшолақов.

Мемлекет басшысының жанар-жағармай нарығын реформалау жөніндегі тапсырмасы бойынша мынадай шараларды қабылдау жоспарлануда:

Бірінші. Мұнай өнімдерін өндіру және бөлу саласында ашықтықты және транспаренттілікті қамтамасыз ету.

Екінші. «ҚазМұнайГаз» ҰК» АҚ базасында 150 мың тонна көлемінде және «ҚТЖ» ҰК» АҚ базасында 50 мың тонна көлемінде ірі тұтынушыларда мұнай өнімдерінің резервтерін құру.

Үшінші. Қазақстан Республикасының аумағынан автомобиль көлігімен мұнай өнімдерін әкетуге тыйым салуды 6 айға ұзарту бойынша бұйрық қабылдау.

Төртінші. Мұнай базаларын есепке алу-бақылау аспаптарымен жарақтандыру.

Қысқа мерзімді және орта мерзімді перспективада өндірісті одан әрі ұлғайту үшін бірқатар іс-шаралар жоспарланған.

Сондай-ақ 2022 жылы Шымкент зауытында мұнай жүктеуді  5,2 млн.тоннадан 6 млн. тоннаға дейін арттыруға тырысамыз. Бұл шара ішкі нарықтағы өсіп келе жатқан сұранысты жабу үшін жанар-жағармай  өндірісін ұлғайтуға мүмкіндік береді.

2025 жылға дейін Павлодар мұнай өңдеу зауытында  гидротазарту қондырғысын реконструкциялау жобасы іске асырылатын болады, ол өнімділікті 6 млн.тоннаға дейін арттыруға (қолданыстағы 5,4 млн.тн) және бұрын өндірілмеген 160 мың тонна қысқы дизель отынын өндіруге мүмкіндік береді.

Ақтау битум зауытындағы реконструкциялаудың арқасында битум өндіру қуаты жылына 400-ден 450 мың тоннаға дейін артады.

2021 жылдың қорытындысы бойынша мұнай өнімдерін өндіру 12,7 млн. тоннаны құрады.

Мұнай өнімдерінің негізгі түрлерінен: бензин өндірісі – 4,8 млн.тонна, дизель отыны – 4,9 млн. тонна, мазут – 2,4 млн. тонна және авиакеросин – 586 мың тонна. 2022 жылға арналған жоспар – 13,3 млн.тонна құрайды.

• 18.03.2022
• 300