Қазақстандағы мұнай-газ-химиясының дамуы туралы

Бүгінде жағармай материалдары, полипропилен, метил-трет-бутил эфирі, бензол және параксилол шығарылуда.

2021 жылдың қорытындысы бойынша мұнай-газ-химия өнімдерін өндіру көлемі 190 мың тоннаны құрады.

2022 жылы жоспарланған өндіріс көлемі 560 мың тоннаны құрайды.

Анықтама үшін: 2020 жылы МГХ өнімдерінің өндіріс көлемі 360 мың тоннаны құрады. 2021 жылы өндіріс көлемінің төмендеуі «АМӨЗ» ЖШС-ның жоспардан тыс тоқтауына байланысты (қаңтар).

2021 жылы Шымкент қаласында қуаты 57 мың тонна октан көтергіш қоспа шығаратын зауыт, сондай-ақ қуаты 54 млн. м3 техникалық газ және 34 млн. м3 құрғақ сығылған ауа шығаратын қондырғылар іске қосылды. Сондай-ақ Атырау облысында арнайы экономикалық аймақтың инфрақұрылымдық объектілері толығымен іске қосылды.

Экономика құрылымындағы өңдеу өнеркәсібінің үлесін арттыру және мұнай-газ-химиясы саласындағы импортты алмастыруды қамтамасыз ету мақсатында бірқатар ірі жобалар іске асырылатын болады.

Ағымдағы жылы қуаты жылына 500 мың тонна полипропилен өндіретін зауытты іске қосу жоспарланған. Ағымдағы жылдың өзінде зауыт шамамен 110 мың тонна полипропилен шығаруды жоспарлап отыр.

Сондай-ақ өндіріс бойынша басты назар мынадай ірі жобаларды іске асыруға бағытталатын болады:

қуаты жылына 1 млн. тонна терефталь қышқылы мен полиэтилентерефталат өндірісі;

қуаты жылына 1,25 млн. тонна полиэтилен;

қуаты жылына 186 мың тонна бутадиен.

Инвестициялардың жалпы көлемі – шамамен 10 млрд. АҚШ доллары.

• 18.03.2022
• 266