Болат Ақшолақов электр энергетикасы саласының негізгі көрсеткіштері туралы айтты

«Сұр» майнерлердің бақылаусыз өсуіне және электр станцияларындағы авариялық жағдайларға байланысты 2021 жылғы маусымнан бастап тапшылық пайда болды, ол Ресей Федерациясынан шамамен 300 млн.кВтсағ көлемінде теріс сальдо-ағын есебінен жабылды.

2021 жылдың қорытындысы бойынша электр энергиясын өндіру көлемі 114,4 млрд.кВтсағ құрады. 2022 жылға электр энергиясын өндіру жоспары – 114,4 млрд. кВтсағ.

Жаңартылатын энергия көздері бойынша 2021 жылдың қорытындысына сәйкес жаңартылатын энергия көздері объектілері өндірген электр энергиясының көлемі 4,2 млрд.кВт.сағ құрады. Жаңартылатын энергия көздерінен электр энергиясын өндірудің 2022 жылға арналған алдын ала жоспары – 4,5 млрд.кВт.сағ.

Қуат нарығы шеңберінде 2022-2025 жылдары жалпы инвестиция көлемі 491 млрд теңгеден асатын 1 760 МВт-ты іске қосуға мүмкіндік беретін жобалар іске асырылуда.

Ұлттық электр желісін жаңғырту, оның ішінде батыс және оңтүстік аймақтардың энергия жүйесін күшейту, батыс аймақты Біртұтас электр энергетикасы жүйесіне қосу бойынша жұмыстар жүргізілуде.

Жаңартылатын энергия көздері секторына инвесторлар тарту бойынша жұмыстар жалғасуда. 2022 жылы 225 млн.доллар сомасына жиынтық қуаты 290 МВт жаңартылатын энергия көздерінің 10 жобасын пайдалануға беру жоспарлануда.

Электр энергиясы мен қуатының тапшылығын болдырмау мақсатында                     2021 жылғы қарашада Жамбыл ГРЭС-інің 3-ші блогы, ал 2022 жылғы қаңтарда             4-ші энергия блогы іске қосылды, бұл жиынтығында ГРЭС жүктемесін 330 МВт-қа (280-ден 610 МВт-қа дейін) ұлғайтуға мүмкіндік берді.

Сондай-ақ орталықтандырылған сауда-саттықта электр энергиясының тапшылығы мен жоспарлы импорты кезінде майнерлерді шектеу тетіктері енгізілді.

Бүгінгі таңда заңсыз цифрлық майнинг субъектілерін анықтау бойынша жұмыс жалғасуда. Осы субъектілерді одан әрі реттеу шеңберінде мына мәселелер пысықталуда:

1. цифрлық майнинг қызметін лицензиялауды енгізуді және цифрлық майнинг субъектілерінің электр энергиясын тұтынуына квоталарды айқындауды көздейтін заңнамаға түзетулерді енгізу;

2. жаңа майнерлер үшін қуаттарды қосуға мораторий енгізу;

3. цифрлық майнинг субъектілерін электр энергиясын жаңартылатын энергия көздерінен және импорттан тұтынуға ауыстыру.

• 18.03.2022
• 234