Нұрлан Ноғаев халық пен мемлекеттік органдар арасындағы байланысты күшейтуді тапсырды

Аймақ басшысы Нұрлан Ноғаев Түпқараған ауданына сапарының екінші күні Форт-Шевченко қаласының тұрғындарымен бірқатар кездесу өткізді, деп хабарлайды Маңғыстау облысы әкімінің баспасөз қызметі.

Есептік кездесу барысында аудан әкімі Айбек Қосуақов жыл бойы атқарылған жұмыстар туралы есеп берді. Нұрлан Ноғаев өз кезегінде Түпқараған ауданы тұрғындарының сұрақтарына жауап берді. Жиында халықты ауыз сумен қамту, денсаулық сақтау саласы, спорт жарыстарын қаржыландыру тәртібі, жұмыспен қамту және тағы басқа  мәселелер көтерілді. 

Нұрлан Ноғаев Түпқараған ауданының денсаулық сақтау саласының жағдайымен танысты. Аудан бойынша 1 орталықтандырылған аурухана, 4 дәрігерлік амбулатория, 1 фельдшерлік-акушерлік пункт және 2 жеке клиника жұмыс істейді. Туберкулез  ауруханасының ғимаратына күрделі жөндеу жүргізіліп, кейін бұл нысан провизорлық стационарға айналған. Сондай-ақ, аудандық аурухананың инфекциялық және балалар бөлімшесіне күрделі жөндеу жүргізіліп, оттегімен қамтамасыз ететін 87 пункт орнатылған. Қазір ауданда барлығы 48 дәрігер, 150 кіші медицина қызметкері бар.

Содан соң облыс әкімі аудан белсенділерімен кездесті. Онда жұмысқа орналасу, экология, халықты ауыз сумен қамтамасыз ету және жер қатынастары, теңіз порты және темір жол құрылысы мәселелері талқыланды. Жиынға белсенділерден басқа, жергілікті атқарушы органдардың басшылары, ардагерлер және басқа да жауапты тұлғалар қатысты.

Нұрлан Ноғаев кеңесте көтерілген мәселелер басымдықтарға байланысты дәйекті түрде шешілетінін атап өтті.

- Атқарушы органдар мен халық арасындағы байланысты тереңдетуіміз қажет. Бұл тапсырма ел президенті Қасым-Жомарт Тоқаевтың Жолдауында көрініс тапқан. Белгілі бір шараларды қабылдауда халықтың сұранысы мен ұсыныстарын ескеру маңызды. Мемлекет басшысының тапсырмаларын іске асыру мақсатында біз еңбек ұжымдарымен, ауыл, қала, аудан және облыс тұрғындарымен жиі кездесулер ұйымдастырамыз. Бұл аймақтағы мәселелерді дер кезінде шешуге мүмкіндік береді. Айта кетейік, мұндай кездесулер өз тиімділігін көрсетіп те үлгерді. Сондай-ақ, бізде Telegram қосымшасында арнайы чат-арна жұмыс істейді, онда 9 мың адам бар. Менің әріптестерім және жеке өзім күн сайын халықтың сұрақтарына жауап береміз. Бұл кері байланыстың жақсы құралы, - деп атап өтті облыс әкімі.

Бұлан бөлек, Нұрлан Ноғаев Түпқараған ауданының жастарымен еркін форматта кездесу өткізді. Жиналыс барысында ол облыста жүргізіліп жатқан жұмыстар туралы айтып, қатысушылардың сұрақтарына жауап берді. Жастар өз кезегінде облыс әкіміне көрсетіліп жатқан қолдау үшін алғыс білдірді. 

Ал Нұрлан Ноғаев жергілікті атқарушы органдар жастар бастамаларына жан-жақты қолдау көрсетуге дайын екенін атап өтті.

• 24.03.2022
• 170