«Даму» Қорының Басқарма төрайымы Гаухар Бурибаеваның Маңғыстау облысына жұмыс сапары

«Даму» Қорының Басқарма төрайымы Гаухар Бурибаева Маңғыстау облысына барды. Жұмыс сапары барысында Қордан қолдау алған әлеуметтік маңызы бар бірнеше кәсіпорын жұмысымен танысты. Алдымен ат басын бұрған нысан: 

«OSS Kazakhstan» ЖШС. Ол – қазақстандық «Uly Dala Холдинг» компаниясы мен сингапурлық «OSS Strategic Holdings» сервистік компаниясының бірлескен кәсіпорны. Негізінен мұнай-газ, тау-кен өндіру, химия сияқты салаларға арналған жабдықтар мен олардың жиынтықтарын шығарады. Әр кезеңінде 200-ге дейін адамды жұмыспен қамтуға мүмкіндігі бар. «Даму-Өндіріс» бағдарламасы аясында жеңіл несие алған. 

Ал «MAGA BREAD» – толық автоматтанған, заманауи компьютерлік технологиялармен басқарылатын нан зауыт. Тәулігіне мұнда 30 тонна өнім шығады. Макарон өнімдері желісі де бар. Құрал-жабдықтар мен технология Германиянікі. Кәсіпорын «БЖК-2025» және «Даму-Өндіріс» бағдарламасына қатысып, жеңіл несие, Қордың кепілдігі секілді қолдау алған. 

Одан кейін «Даму» Қорының төрайымы «WestEcoPlast» кәсіпорынын аралады. Компания 2017 жылдан бері әртүрлі полимер бұйымдар жасап, азық-түлік және азық-түлік емес тауарларды сақтауға, тасымалдауға және орауға арналған 50-ден 2000 кг-ға дейін көтеретін әртүрлі мөлшердегі қаптар мен биг-бэгтер шығарумен айналысады. Кәсіпкер «БЖК-2025» мемлекеттік бағдарламасы аясында банктен алған несиесінің пайызын субсидиялаған. 

«Children Caspian» ЖШС ашқан «SMART ILIM» атты үш қабатты мектеп-гимназиясында қазір 1050 бала оқып жатыр. Гаухар Асылбекқызы заманауи технологиялармен толық жабдықталған оқу орнын аралап көрді. Мұнда баланың шығармашылық қабілетін шыңдап, сапалы білім алуына, ғылыми жұмыспен айналысуына жақсы жағдай жасалған. Жоба «Даму Аймақтар III» бағдарламасы аясында мемлекеттен қолдау алды. 

Жалпы, Маңғыстау облысы бойынша 2021 жылы «БЖК - 2025» бағдарламасы аясында 1 187 жоба субсидия , 872 жоба кепілдік алған.

• 04.04.2022
• 295