«Жаңа Қазақстанда жаңа ұлт болмысын қалыптастыру үрдістері» тақырыбында ҚХА Ғылыми-сарапшылық кеңесінің жұмыс отырысы өтті

2022 жылғы 6 сәуірде Ақпарат және қоғамдық даму министрлігінің қолдауымен Қолданбалы этносаяси зерттеулер институты «Жаңа Қазақстанда жаңа ұлт болмысын қалыптастыру үрдістері»  тақырыбында ҚХА Ғылыми-сарапшылық кеңесінің жұмыс отырысын өткізді.

Іс-шараға Қазақстан халқы Ассамблеясы Төрағасының орынбасары, Қазақстан Республикасы Президенті Әкімшілігінің Қазақстан халқы Ассамблеясы хатшылығының меңгерушісі М.Әзілханов, ҚР Парламенті Мәжілісінің депутаттары А.Сарым, Б.Әбдіғалиұлы, Қ.Нұров, ҚР Ақпарат және қоғамдық даму министрлігі Этносаралық қатынастарды дамыту комитеті төрағасының орынбасары А.Жақсыбаев, ҚХА Ғылыми-сарапшылық кеңесі мен Ғылыми-сарапшылық топтарының мүшелері, жас ғалымдар және басқалары қатысты.

Кеңестің ашылуында Марат Әзілханов Мемлекет басшысының саяси реформалар бағдарламасында ұлтты біріктіру мәселелері ерекше орын алатынын, мемлекет бүгінде этносаралық қатынастар мәселелері бойынша ғалымдардың, сарапшылар мен азаматтық қоғам өкілдерінің көзқарастары, берер бағасы мен ұсыныстары қажет екендігін атап өтті.

ҚР БҒМ Ғылым комитеті Мемлекет тарихы институтының директоры, профессор Е. Әбіл өз сөзінде ұлттық тарихты репрезентациялауда жаңа әдіснамалық тәсілді әзірлеу қажеттігіне, Қазақстан тарихының әлемдік тарихқа қосқан объективті үлесін, оның бүкіл адамзаттың дамуына әсерін көрсетудің маңыздылығына назар аударды.

ҚХА ҒСК төрағасының ғылыми бағдарламаларды дамыту жөніндегі орынбасары З. Шаукенованың пікірінше, Қазақстан халқы Ассамблеясының пулын Мәжілістен Парламент Сенатына ауыстыру Мемлекет басшысының бейбітшілікті сақтау және ұлт бірлігін нығайту саясатына деген ұстанымын көрсетеді.

А. Байтұрсынов атындағы Тіл білімі институтының директоры А. Фазылжанова өз кезегінде ұлттық идеологияның құралы да, өзегі де – мемлекеттік тіл деген пікірді білдірді. Оның айтуынша, Қазақстан азаматтарының санасында ортақ құндылықтар орныққанда жалпымемлекеттік бірегейлік орнайды.

Іс-шара соңында ҚХА Ғылыми-сарапшылық кеңесінің құрамына жаңа мүшелерді қосу мәселесі талқыланып, қатысушылар ұлт құру үрдістері бойынша пікірлерімен алмасты.

• 07.04.2022
• 220