Қарқаралыда көпжылдық су мәселесі шешілмек

Қазір аудан үшін маңызды жобалардың бірі Жарлы – Қарқаралы су тартқышының құрылысы. Өткен жылы жер асты су орнында төрт ұңғыма бұрғыланды. Биылғы жылы сорғы станциялары мен резервуарларды және құбырларды салу жоспарлануда. Ал келесі жылы іске қосу және аумақты абаттандыру жұмыстары атқарылады. Су таратқыштың ұзындығы 40 км құрайды. Құрылыс кезінде Қарқаралы табиғатына зиян келтірілмеуіне назар аударылады.

Сондай-ақ аудан тұрғындарымен есеп беру кездесуін және жеке қабылдауды өткіздім. Қарқаралдықтар тұрғын үй-коммуналдық сала, мектептер мен ауыл клубтарын жөндеу, жолдардың жағдайы, жайылымдардың жетіспеушілігі мәселелерін көтерді.

Егіндібұлақ тұрғындары бұрынырақта шығыс бағыттағы жолдың салынуын өтінген еді. Көптен күткен бұл жоба биыл басталады. Жаңа жол Егіндібұлақтан 90 км-ге созылады. Сонымен қатар, Тегісшілдік – Көктас, Қарқаралы – Қарағайлы жолдарын, Мамыраев – Қоянды, Қарабұлақ ауылдарының кіреберістерін жөндеу жоспарланған.

Тұрғын үй мәселесі Қарқаралыда да өзекті. Биыл кезекте тұрған азаматтар үшін 36 пәтерлі екі көпқабатты үй салынады.

Әлеуметтік нысандарға келетін болсақ, Қарқаралыдағы Мәди Бәпиұлы атындағы мектепке және Теректі ауылындағы мектепке ағымдағы жөндеу жұмыстары қарастырылған.

Сондай-ақ Қарқаралы кітапханасы мен алты ауылдық клуб жөнделеді. Бұған қоса ауылдарда жаңа спорт және ойын алаңдарын орнатудың арқасында бос уақытты пайдалы өткізуге жаңа мүмкіндіктер пайда болады.

Аудан тұрғындары үшін медициналық көмек көрсетудің сапасы да жақсартылуда. Қазіргі уақытта гемодиализ қызметі қолжетімді болып отыр. Енді бүйректің созылмалы аурулары бар емделушілер жақын маңда тиісті ем-домды қабылдай алады. Биылғы жылы мұнда компьютерлік томография кабинеті бар клиникалық-диагностикалық зертхананы ашу жоспарлануда.

• 08.04.2022
• 254