Ақтөбе облысының әкімдігінде көктемгі дала жұмыстарына дайындық мәселесі талқыланды

Өңір басшысы Оңдасын Оразалиннің төрағалығымен өткен жиында Ақтөбе облысының көктемгі дала жұмыстарына дайындығы талқыланды. Биылғы жылы 722,3 мың гектар алқапта көктемгі дала жұмыстарын жүргізу жоспарлануда. Жалпы егіс алқабының 52% дәнді дақылдар, 34,6% мал азықтық және 11,8% майлы дақылдар, 0,9% картоп, 0,7% көкөніс және бақша дақылдары құрайды. Ауыл шаруашылығы дақылдарының негізгі үлесі немесе 76,7 пайызы дәстүрлі түрде облыстың 4 ауданы Әйтеке би, Қарғалы, Мәртөк және Хромтау аудандарына тиесілі.

Облыс әкімі ауыл шаруашылығы тауарын өндірушілерді қажетті көлемде минералды тыңайтқыштармен, тұқымдармен, жанар-жағармаймен, техникамен және басқа да ресурстармен уақытылы қамтамасыз етуді тапсырды. Жиын барысында егіс жұмыстарына қаржылай қолдау көрсету, егіс науқаны кезінде өрт қауіпсіздігі шараларын сақтау мәселелері де талқыланды.

Қазіргі таңда Ақтөбе облысында шаруалар 2,2 мың тонна минералды тыңайтқыш пен 210,5 мың литр гербицид сатып алуға келісім-шарт жасасқан. Ауыл шаруашылығы дақылдарының 38 мың тонна тұқымы құйылды. Ауыл шаруашылығы техникасының негізгі түрлерінің көктемгі дала жұмыстарына дайындығы 97 пайызды құрап отыр.

• 19.04.2022
• 223