Ақтөбеде шолу шеңбері мен Сазды өзені арқылы өтетін жаңа көпір салынуда

14 сәуір күні облыс әкімі Оңдасын Оразалин Ақтөбе қаласын жұмыс бабымен аралап шықты. Облыс әкімі Тұңғыш Президент атындағы саябақта салынып жатқан шолу шеңберінің құрылыс барысымен танысты. Аттракцион "Планета парк" компаниясының қаржысына тұрғызылып жатыр. Аталмыш мекеме басшысы Алексей Кодочигов жобаны қала күніне орай аяқтауға уәде берді. Шолу дөңгелегінің биіктігі - 42 метр. Оның 24 кабинасы жазда кондиционерлермен, қыста жылыту құрылғысымен жабдықталатындықтан жыл бойы пайдаланылатын болады. Жанынан басқа да аттракциондар салынбақ.

12 шағын аудандағы Мәншүк Мәметова аллеясында облыс әкімі Оңдасын Оразалинге аумақты абаттандырудың егжей-тегжейлі жобасы көрсетілді. Мұнда Сазды өзені арқылы өтетін көпір өткелін орнату жоспарлануда. Жаңа көпір екі жолақты болады, толық ені - 11,36 метр, көпір өтпесінің ұзындығы - 23,4 метр. Облыс басшысы құрылыс-монтаждау жұмыстарын биыл күзге қарай, жаңа оқу жылы басталғанға дейін аяқтауды тапсырды. Айта кету керек, көпір өткелін салу туралы шешім тұрғындардың өтініштерін ескере отыра қабылданған болатын.

Кейін өңір басшысы Оңдасын Оразалин Есет батыр тұрғын үй алабындағы жаңа саябаққа барды. Мұнда мердігерлер жұмыстың бір бөлігін аяқтаған, яғни кеспе тастарды төсеп заманауи жарықтандыру тіректерін орнатқан, бірнеше балалар аймағын жабдықтаған.

«Осы айда негізінен қылқан жапырақты талдарды отырғызуды бастаймыз. Сондай-ақ, мамыр айында біз гүл егеміз. Оларды күтіп ұстау үшін суару жүйесі салынды", - деп атап өтті қала әкімі Асхат Шахаров.

Шағын аудан тұрғындары да жаңа демалыс орны туралы оң пікірде. Қаланы аралап шыққан облыс әкімі бірқатар тапсырмалар берді, соның ішінде облыс орталығын абаттандырып, санитарлық жағынан тазартуды тапсырды.

«Қысқа мерзімде біз қыстан қалған қоқысты тазартып, аумақты абаттандырып, көгалдандыруымыз керек. Сондай-ақ, осы көктемде су тасқынына тап болған проблемалық учаскелерді анықтап, жұмысты бастау керек: кей жерлерде арналарды кеңейту, кей жерлерде арықтар мен көпірлер салу қажет. Қазір біздің міндетіміз - жазға дейін қаланы қоқыстан тазарту. Бұл жұмысқа тұрғындарды тарту керек. Тұрғындар ең болмағанда, өз үйлерінің аумақтарын абаттандыруға көмектесуі керек. Бұл біздің ортақ міндетіміз», - деді облыс әкімі.

• 19.04.2022
• 223