Маңғыстауда облыстық аналар кеңесімен бірлесіп «Еңбегі жанған арулар» іскер әйелдер форумы өтті.

Шараға Қазақстан іскер әйелдер қауымдастығының төрайымы Раушан Сәрсембаева, Қазақстан аналар кеңесінің төрайымы Нәзипа Шанаи бастаған облыстың іскер әйелдері мен көп балалы аналар қатысты, деп хабарлайды облыс әкімінің баспасөз қызметі.

Форумда қолөнер бұйымдарының көрмесі ұйымдастырылды.

Бүгінгі таңда елімізде кәсіпкер әйелдердің рөлі ерекше. Олардың саны күн сайын артып келеді. Соның нәтижесінде облыста шағын және орта бизнесте жұмыс істейтін әйелдердің үлесі 53%-ға дейін өсті.

Жиында сөз алған аймақ басшысы аруларға сәттілік тілеп, қоғамның дамуына үлес қосып жүрген барша нәзік жандыларға алғысын білдірді.

– Әйел адамдардың қоғамдағы орны ерекше. Сіздердің еңбектеріңізді бағалап, өз атымнан алғыс айтқым келеді. Сіздер ұрпақ тәрбиесінен бөлек, қоғамның әр саласында табысты еңбек етіп келесіздер. Оған үлкен күш керек. Мемлекет басшысы әйелдерге жан-жақты қолдау көрсетуде. Біз де өз тарапымыздан аруларымызды әрқашан қолдауға дайынбыз,-деді Нұрлан Ноғаев. 

Форум аясында іскер әйелдер қауымдастығы мен аналар кеңесі әлеуметтік жобаларды жүзеге асыру мақсатында қайырымдылық шараларды өткізуге арналған меморандумға қол қойды.

– “Бір ананың тәрбиесі – бір ұлттың тәрбиесімен тең”. Біздің алдымызда ұлттың тірегі - ұрпақты тәрбиелеу міндеті тұр. Сондықтан, ел Президенті Қасым-Жомарт Тоқаевтың қолдауымен біз «Мәдениетті ана – Мәдениетті ұлт» қоғамын қалыптастыруға жұмыстанып жатырмыз,-деді Нәзипа Шанаи. 

Шара соңында әр салада жұмыс істейтін әйелдер арасында ұйымдастырылған байқаудың қорытындысы белгілі болды. Олар өңірдің әлеуметтік-экономикалық дамуына қосқан үлесі үшін облыс әкімінің алғыс хатымен марапатталды.

Бұдан кейін облыс әкімі форум қонақтарымен бірге «Ана мен бала» облыстық перинаталдық орталығында болып, жұмыс барысымен танысты.

• 20.04.2022
• 188