Ұлттық экономика министрі Президенттік жастар кадрлық резервінің өкілдерімен кездесті

Бүгін Нұр-Сұлтанда Ұлттық экономика министрлігінің қызметкерлері Президенттік жастар кадрлық резервінің өкілдерімен кездесті. Іс-шараға «Бәйтерек» ҰБХ» АҚ басқарма төрағасы Қанат Шарлапаев, ҚР Мемлекеттік қызмет істері агенттігі төрағасының орынбасары Азамат Жолманов және ПЖКР кеңсесінің өкілдері, жалпы 100-ге жуық адам қатысты. Өз сөзінде ұлттық экономика министрі жиналғандарды қасиетті Рамазан айымен құттықтап, алдағы жұмыстарына сәттілік тіледі. Мемлекет басшысы Қ.Тоқаевтың бастамасымен құрылған Президенттік кадрлық резервіне енген жас қазақстандықтардың Жаңа Қазақстанның дамуына едәуір үлес қосатынына сенім білдірді. Ол Министрлік адами ресурстарды дамытуға зор көңіл бөлетінін және ведомство жұмысы барынша ашықтық принциптеріне негізделгенін атап көрсетті. «Бүгінде министрлікте және ведомстволық бағынысты ұйымдарда 18 резервші жұмыс істейді. Олардың біразы басшылық қызметте. Осылайша, ҰЭМ Президенттік жастар кадрлық резервінің мүшелерін жұмысқа орналастыру бойынша мемлекеттік органдар арасында көш бастап тұр», - деді министр. Айта кетсек, Әлібек Қуантыров – Президенттік кадрлық резервінің министр лауазымына тағайындалған алғашқы өкілі. Кездесуге келсек, ашық диалог барысында қатысушылар әлеуметтік-экономикалық мәселелер бойынша өздерінің ұсыныстары мен идеяларын ортаға салды.  Атап айтқанда, өңірлерді дамыту, экспорт, инвестиция тарту, жұмыспен қамту, кәсіпкерлікті қолдау, салық саясаты, бюджетаралық байланыстар, ШОБ және МЖӘ (мемлекеттік-жекешелік әріптестік) мәселелері қозғалды. Кездесу қорытындысы бойынша ҰЭМ басшысы барлық ұсыныстарды қарастыруға уәде беріп, Президенттік жастар кадрлық резервінің мүшелерін бірлесе жұмыс істеуге шақырды.

• 21.04.2022
• 193