Қарағанды облысында шахтерлердің талаптарын орындауға баса назар аударылуда

Саран қаласының тұрғындарымен кездесу барысында шахтерлер «АрселорМиттал Теміртаудың» өзіне алған міндеттемелерін орындау бойынша бірқатар мәселелерді көтерген еді. Осы орайда компания басшылығымен, кеншілермен және кәсіподақ ұйымдарымен кездестім. Күн тәртібінде «Абай» шахтасындағы қайғылы оқиғадан кейін келісім комиссиясы қабылдаған ұжымдардың талаптарын орындау мәселесі қаралды.

Белгілі бір жұмыстардың жүргізілгеніне қарамастан, еңбек қауіпсіздігін қамтамасыз ету, жабдықтарды жаңарту мәселелері әлі де шешуді қажет етеді. Бұл мәселені бақылауда ұстаймыз. Себебі мен үшін кеншілердің еңбек қауіпсіздігі аса маңызды. Сондықтан нақты шаралардың қабылдануына қол жеткіземіз.

Енді жасалған жұмыстарға тоқталсақ. Қазірдің өзінде 61 отбасы жеңілдетілген ипотеканы алды. Тағы 60 отбасы құжат жинау сатысында.

Сонымен қатар ескірген жұмыс көліктерін жаңарту жұмыстары басталды. Осы жылға жоспарланған 56 автобустың 12-і пайдалануға беріліп, тағы 14 автобус жеткізіледі деп күтілуде.

Кадр тапшылығын жою бойынша жұмыстар біртіндеп жүргізілуде. Компания ай сайын көмір департаментінің кәсіпорындарына шамамен 120-130 адамның қабылданып жатқаны жайлы есеп берді. Бұл ретте жергілікті мамандарды іздеп тауып, жұмысқа орналастыруға басымдық беруді кеңес еттім.

Мұндай кездесулер кеншілердің ұжымдары көтерген барлық мәселелер орындалғанша дейін жалғасатын болады.

• 22.04.2022
• 274