Ұлттық экономика министрі Ұлыбританияның Қазақстандағы елшісі Кэти Личпен кездесті

Бүгін Ұлттық экономика министрі Әлібек Қуантыров Ұлыбританияның ҚР-ғы Төтенше және Өкілетті елшісі Кэти Личпен кездесті. 

Кездесу барысында тараптар екіжақты ынтымақтастық мәселесін талқылап, сауда қатынастарын дамыту мен нығайтудың едәуір әлеуетін атап өтті.

ҰЭМ басшысы атап көрсеткендей, Ұлыбритания Қазақстанның негізгі әріптесінің бірі болып табылады. Инвестициялық ынтымақтастықты кеңейту өзара саудаға елеулі серпін береді.

Сонымен қатар, министр 2060 жылға қарай көміртегі бейтараптығына ұмтылып отырған Қазақстанның «жасыл» бастамаларымен бөлісті.

«Таза энергияға көшу тұрғысында бізді еуропалық елдердің, оның ішінде Ұлыбританияның тәжірибесі қызықтырады. Біз өткен жылы жүйелік құжатты әзірлеу жұмысын бастадық. Аймақтағы қазіргі экономикалық жағдайды ескере отырып, жоба қосымша пысықталуда. Стратегияны толыққанды іске асыру «жасыл» технологияға тиімді көшуге мүмкіндік береді», - деді Ә.Қуантыров.    

Өз кезегінде, Кэти Лич британдық тараптың Қазақстандағы ЖЭК-жобалардың дамуын, елдің көміртегі бейтараптығына қол жеткізу жөніндегі СОР-26 мен Париж келісімі мақсаттарын іске асыруға ұмтылысын қолдайтынын жеткізді.

«Ұлыбритания Қазақстанның бұл бағыттағы жоспарларын жоғары бағалайды. Біз тәжірибемізбен бөлісуге дайынбыз. Бізде бұл процесс баяғыда басталып, қазіргі уақытта жаңартылатын энергия көздерінің үлесі едәуір өсті. Жалпы, бізді қазақстандық нарық қызықтырады», - деді Кэти Лич.

 Кездесу қорытындысында министр британдық инвесторларды ұлттық жобаларды, әсіресе ЖЭК саласындағы жобаларды іске асыруға қатысуға шақырды. 

• 22.04.2022
• 168