Теміртау қаласының тұрғындарымен кездестім

Қала тұрғындарының сұрақтарына жауап беріп, Теміртауды дамыту жайын сөз еттік. Тұрғындарды бірінші кезекте ТКШ, жолдарды жөндеу және аула аумақтарын абаттандыру мәселелері алаңдатып отыр. Кейбір мәселелерді шешу үшін көп уақыт қажет болса, енді бірін тез арада қарастырып, шешуге мүмкіндік бар.

Мәселен, биыл қалада инженерлік желілерге назар аударылып, № 2 және 3 жылу магистральдарын күрделі жөндеу жоспарланған. Бұған қоса, Мичурин көшесіндегі суағарды жөндеу жұмыстары басталады. Бұл 40 мыңнан астам тұрғынды сапалы сумен қамтамасыз етуге мүмкіндік береді. Сондай-ақ Ақтау кенті мен Соцгород су құбыры желілерін қайта жаңарту қарастырылған.

2-ЖЭО-да жетінші қазандықтың құрылысына қатысты. Қазандықтың құрылысы келесі жылдың ортасында аяқталады. Құрылысты биылғы жылу беру маусымы басталғанша дейін толық аяқтауды жоспарлаған едік, бірақ әлемде орын алған тұрақсыз жағдай логистика тұрғысынан жұмыстарды қиындатты. Бұл жұмыстар тиісті назарға алынды.

Қаладағы жолдар туралы айтып өтсем. Биыл Теміртауда 11 көше ретке келтіріліп, Ақтау кентінің жолдары жөнделеді.

Кездесуде тұрғын үйге қатысты мәселелер де көтерілді. Биыл төрт көпқабатты тұрғын үй пайдалануға беріледі. Кезекте тұрған 200-ден астам адам пәтер алады. Сондай-ақ кезектілік тәртібімен жеке тұрғын үй құрылысы үшін жер учаскелері беріледі.

• 23.04.2022
• 250