Ұлттық экономика министрі Ә.Қуантыров Вашингтонда Дүниежүзілік банк пен Халықаралық валюта қорының өкілдерімен кездесті

ҚР Ұлттық экономика министрі және Қазақстаннан Дүниежүзілік Банк басқарушысы Әлібек Қуантыров үкіметтік делегация құрамында Дүниежүзілік банк пен Халықаралық валюта қорының жыл сайынғы көктемгі кездесулеріне қатысты.

ҰЭМ басшысы Еуропа және Орта Азия өңірі бойынша ДБ вице-президенті Анна Бъердемен жұмыс бабымен кездесу өткізді. Тараптар Қазақстан мен Дүниежүзілік Банктің одан әрі ынтымақтастығы мәселелерін талқылады. Министр елімізде жүргізіліп жатқан әлеуметтік-экономикалық дамуды қамтамасыз етуге бағытталған реформалар туралы айтып берді. Өз кезегінде Бъерде ханым Қазақстанның бұл бағыттағы іс-әрекетін жоғары бағалады.

Сондай-ақ, А.Қуантыров ДБ-ның адам дамуы жөніндегі вице-президенті Мамта Муртимен, ДБ-ның әлеуметтік қорғау және еңбек мәселелері жөніндегі жаһандық директоры Михаль Рутковскимен және халықаралық қаржы корпорациясының вице-президенті Стефани фон Фридебургпен келіссөздер жүргізді.

Атап айтқанда, кездесуде экономиканы әртараптандыру, жұмыспен қамту, адами капиталды дамыту және әлеуметтік теңсіздік проблемалары қозғалды.

Сонымен қатар, Ұлттық экономика министрі Дүниежүзілік Банктің климаттың өзгеруі жөніндегі бағдарламалары туралы айтып берген ДБ-ның инфрақұрылым жөніндегі өңірлік директоры Чарльз Комьемен кездесті. Қуантыров атап өткендей, Қазақстан 2060 жылға қарай көміртегі бейтараптығына қол жеткізуді жоспарлай отырып, «жасыл» жобаларға көп көңіл бөледі.

Вашингтонға жұмыс сапары аясында Мемлекеттік департамент пен АҚШ Қаржы министрлігінің өкілдерімен бірқатар екіжақты кездесулер өткізілді. Кездесуге қатысушылар әлемдік нарықтағы ағымдағы жағдайды талқылады. Әлеуметтік-экономикалық жағдай үшін туындайтын тәуекелдерді нивелирлеу мақсатында Қазақстан бірқатар дағдарысқа қарсы, оның ішінде макроэкономикалық тұрақтылықты қамтамасыз етуге бағытталған шаралар қабылдап жатқаны атап өтілді.

Сондай-ақ, американдық сыртқы саясат кеңесінің мүшесі Маниша Сингхпен, Брукингс институтының бас экономисі Дэвид Доллармен және ХВҚ-ның Қазақстан бойынша миссиясының басшысы Николя Бланшемен кездесулер өтті.

Дүниежүзілік банк пен ХВҚ-дан басқа, қазақстандық делегация Американың жетекші экономистерімен кездесті. Кездесуде ҚР мен АҚШ арасындағы сауда-экономикалық қарым-қатынастарды, әсіресе жаңа сын-қатерлер жағдайында нығайту мәселелері қаралды. Сарапшылар шетелдік инвесторлар үшін қолайлы жағдай жасалған Қазақстанның экономикалық көрсеткіштерімен егжей-тегжейлі танысты.

• 26.04.2022
• 148