Шығыс Қазақстан облысына жұмыс сапарымен ҚР Премьер-Министрінің бірінші орынбасары Роман Скляр келді

Шығыс Қазақстан облысына жұмыс сапарымен ҚР Премьер-Министрінің бірінші орынбасары Роман Скляр келді. Облыстарды бөлу жөнінде кеңес өткізілді. Қазірдің өзінде әкімшілік-аумақтық шекаралар анықталды, сонымен қатар болашақ Абай облысының ресурстары мен бюджеті бойынша жоспар толық дайын. Басқармалар мен ведомстволарды орналастыруға келетін болсақ, сұрақтар туындамайды – Семей қаласының коммуналдық меншігінде 13 мың шаршы метрден астам жер бар, тағы 37 мыңды бизнес-құрылымдар ұсынуға дайын. Сондай-ақ, Семей қаласын дамытудың таяудағы бес жылға арналған кешенді жоспары талқыланды, оны іске асыруға 260 миллиард теңге бөлінді, 107-сі маңызды инфрақұрылымдық жобалар бойынша жұмысқа жіберілді, тағы 125 миллиардқа қосымша жобалар ұсындық. Абай облысында екі ірі кәсіпорын - Ақтоғай және Бақыршық тау-кен өндіру кәсіпорны жұмыс істейді, Үржар ауданында агросектордың әлеуеті жақсы, бизнес-идеялар іске асырылуда - осының барлығы болашақ аймақ бюджеті үшін тамаша негіз болады. Сондай-ақ, Семейде Премьер-Министрдің бірінші орынбасары Қарағайлы шағын ауданында болды, онда оңалту орталығы мен түрлі бағыттағы (әлеуметтік және коммерциялық) тұрғын үй салынып жатыр. Волейболдан әйелдер командалары арасында Азияның клубтық чемпионаты өтіп жатқан көпфункционалды мәдени-спорт кешені де назардан тыс қалған жоқ.
Роман Скляр облыс әкімдігінің белсенді жұмысын атап өтіп, Үкімет бірқатар мәселелерді шешуге көмектесуге дайын екенін айтты.

• 28.04.2022
• 281