Нұрлан Ноғаев “Маңғыстау индустриалды паркіне” кәсіпкерлік субъектілерін тарту жұмысын жандандыруды тапсырды.

27 сәуірде аймақ басшысы Нұрлан Ноғаев Маңғыстау индустриалды паркінің жұмысымен танысты, деп хабарлайды Маңғыстау облысы әкімінің баспасөз қызметі.

«Маңғыстау индустриалды паркі» ЖШС Ақтау қаласынан шығысқа қарай 12 шақырым жерде орналасқан. Индустриалды парк аумағындағы зауыт француз мамандарының қатысуымен толық импорттық құрал-жабдықтар негізінде 1976-1980 жылдары салынған.

Зауыт бұрынғы Кеңес Одағы аумағында әртүрлі маркалы полистирол өндіретін ең ірі кешен болған. Қазіргі уақытта зауыттың негізгі өндірістік жабдықтары істен шыққан.
Серіктестіктің акционерлері – «Каспий» ӘКК» АҚ (97,8%) және «ҚазМұнайГаз» Барлау Өндіру» АҚ (2,2%).

Қазіргі уақытта индустриялық аймақтың қызметі жаңа өндірістердің инфрақұрылымын құру және кеңейту бойынша өнеркәсіптік секторда жеке кәсіпкерлікті дамытуға бағытталған. Сондай-ақ, «Маңғыстау индустриалды паркі» ЖШС инфрақұрылымы энергетикалық ресурстарға (электр энергиясы, өнеркәсіптік су) транзиттік қызмет көрсету, кәсіпкерлердің кедергісіз жұмыс істеуіне ыңғайлы болуға пайдаланылады.

Қазіргі таңда аталған кәсіпорыннан 16 мың шаршы метр жер кәсіпкерлерге жалға берілген.

Индустриалды парк аумағында жалпы ауданы 141 000 шаршы метрді құрайтын 32 өндіріс орны бар. Бүгінгі таңда «Маңғыстау индустриалды паркі» ЖШС аумағында 13 кәсіпкер жұмыс істейді. Олар жалпы сомасы 103,5 млн теңгені құрайтын 5 инвестициялық жобаны жүзеге асыруда 

Жұмыс сапары барысында Нұрлан Ноғаев индустриалды парктің әлеуеті жаңа жобаларға жол ашатынын айта келе, жауапты мамандарға кәсіпорынға кәсіпкерлерді тарту жұмыстарын күшейтуді тапсырды. Бұл жұмыстарды жүзеге асыру үшін аталған парктің ішкі құрылымы қайта қаралып, кәсіпкерлерді мемлекеттік қолдаудың қолда бар мүмкіндіктер пайдаланылатын болады.

• 28.04.2022
• 213