Қазақстан халқының бірлігі күнімен шын жүректен құттықтауымды қабыл алыңыздар!

Бұл тамаша көктем мерекесі ежелгі қазақ жерін мекендеген адамдардың ең асқақ армандарын бейнелейді. Қазақ халқы өзінің сан ғасырлық тарихында барлық этностардың мәдениеті мен салт-дәстүрін құрметтей отырып, тұтастығы мен мемлекеттілігін нығайтуға ұмтылды. Достық пен ынтымақтастық, өзара құрмет пен сенім құндылықтары тәуелсіз Қазақстанның негізін қалады.

105 ұлт пен ұлыстың өкілдері тұратын Ақмола өңірі қашанда халықтар достығының бесігіне айналған. Ынтымағымыздың арқасында экономиканың барлық салалары мен әлеуметтік сала серпінді дамып, халықтың өмір сүру деңгейі арта түсуде.

Біз пандемия сынағын абыроймен еңсеріп, қайғылы қаңтар оқиғасы кезінде аймақтағы тұрақтылықты сақтай алдық. Міне, бұл – барша ақмолалықтардың: медицина қызметкерлері мен мұғалімдердің, құқық қорғау және мемлекеттік органдардың қиыншылықтарға қарамастан, қарапайым ауыл еңбеккерлерімен тұрғын үйлер салып, егін егіп, жол төсеу жұмыстарын жалғастырып келе жатқан  өзге де еңбеккерлердің маңдай терлерінің зор өтеуі.

Бүгін біздің алдымызда күрделі, бірақ өте маңызды міндет тұр: Ол – ел Президенті Қасым-Жомарт Тоқаев ұсынған Жаңа Қазақстан тұжырымдамасын жүзеге асыру. Геосаяси шиеленіс пен экономикалық сынақтар жағдайында біз тұрақты ілгерілеуді сақтап қана қоймай, ауқымды әлеуметтік-экономикалық қайта құруларды жалғастыруымыз керек. Бұл іске лайықты  үлес қосу әрқайсымыздың міндетіміз.

Мемлекет басшысы халыққа арнаған Жолдауында атап өткеніндей, «Жаңа Қазақстанда біз «көзқарасы әртүрлі, бірақ біртұтас ұлт» деген қағиданы ұдайы ұстануымыз керек. Сондықтан, бірлікті сақтау, конфессияаралық келісім мен татулықты нығайту – бүгінгі күннің басты басымдығы.

Құрметті жерлестер!

Осынау мереке күні біз достық пен түсіністіктің, құрмет пен қолдаудың әрбір адам үшін қаншалықты маңызды екенін ерекше сезінеміз. Баршамызға зор денсаулық, ашық аспан, отбасыларыңызға амандық және барлық бастамаларыңызға сәттілік тілеймін! Халқымыздың бірлігі мен ынтымағы арта берсін!

• 01.05.2022
• 167