Маңғыстауда этномәдени бірлестіктер “Ұлы Жібек жолы” туралы қойылым қойды

2 мамырда Қазақстан халқының бірлігі күніне орай Үндістанның «Салем-Намасте» энтомәдени бірлестігі “Ұлы Жібек жолының” тарихынан сыр шертетін қойылымның тұсауын кесті, деп хабарлайды  Маңғыстау облысы әкімінің баспасөз қызметі. 

Үнді этномәдени бірлестігінің ұйымдастыруымен өткен шарада орта ғасырлардағы экономиканың дамуына оң серпін берген “Ұлы Жібек жолының”. маңыздылығы айтылды.

“Ұлы Жібек жолы” - әртүрлі халықтар арасындағы достықты нығайтудың алғашқы интеграциялық үлгісі болды.
Ұлы Жібек жолының бір бөлігі Маңғыстаудың бүкіл аумағы арқылы оңтүстіктен солтүстікке, солтүстік-батысқа қарай Үстірт арқылы Маңғыстау тауларындағы Шетпе қақпасы арқылы Түпқараған жағалауы мен Каспий теңізінің Бозашы түбегін бойлай өтті. Екі мың жыл бойы Ұлы жол Шығыс пен Батысты байланыстырды. 

Халықтар арасындағы достық байланысты  қалыптастырудың алғашқы даңғыл жолына айналған Жібек жолының тарихын білу - өзара түсіністік пен татулықты нығайтуға тағы бір қадам болмақ. Театрландырылған қойылымның мақсаты – көрерменге сол заманның атмосферасы мен рухын сезіндіру. 

Қойылымға Маңғыстау облысындағы этно-мәдени бірлестіктердің және алдыңғы буын  өкілдері, оқушылар, жастардан құралған 100-ден астам адам жұмылдырылды. 

Шарадан соң өңір басшысы маңғыстаулықтарды “Айт” мерекесімен құттықтап, қойылымды ұйымдастырушыларға алғысын білдірді.

• 03.05.2022
• 259