Сенат Ұлттық қордан кепілдендірілген трансферт пен 2022 жылға арналған нақтыланған республикалық бюджетті мақұлдады

Бүгін ҚР Парламенті Сенатының пленарлық отырысында депутаттар Ұлттық қордан кепілдендірілген трансферт туралы заң жобасын мақұлдады және 2022 жылға арналған республикалық бюджетке нақтылауларды қабылдады.

Ұлттық экономика министрі Әлібек Қуантыров атап өткендей, макрокөрсеткіштердің болжамы сыртқы экономикалық жағдайды, мұнай нарығындағы үрдістерді ескере отырып нақтыланды.

«Жыл басынан бері ел экономикасы өсімінің оң серпіні байқалуда. Ағымдағы жылғы қаңтар-ақпан айларылың қорытындысы бойынша жалпы ішкі өнімнің өсу қарқыны 3,5%-ды құраса, жыл басынан бері мұнайдың орташа бағасы барреліне $98 құрады. Макрокөрсеткіштерді нақтылау кезінде мұнайдың орташа жылдық бағасы барреліне $90 деңгейінде анықталды», - деп хабарлады ведомство басшысы.

Сонымен қатар, халықаралық қаржы ұйымдарының мәліметі бойынша, ағымдағы жылы әлемдік ЖІӨ өсу перспективаларының төмендеуі күтілуде. Бұл ретте ел экономикасының өсу болжамы 3,9%-дан 2,1%-ға дейін төмендетілді. Номиналды жалпы ішкі өнім 91,5 трлн теңге көлемінде бағалануда, бұл мақұлданған болжамнан 4,5 трлн. теңгеге жоғары.

Ұлттық банктің болжамы бойынша экспорт $72,2 млрд дейін өседі, импорт $40,2 млрд құрайды, инфляция 8-10% дәлізінде айқындалған.

«2022 жылы республикалық бюджеттің кірісі 10,2 трлн теңгеге бағаланып отыр, бұл бекітілген жоспардан 955 млрд. теңгеге жоғары. Ұлттық қордан кепілдендірілген трансферттің мөлшері 4 трлн 30 млрд. теңгеге дейін ұлғайтылады. Қаражат Мемлекет басшысының тапсырмаларын іске асыруға бағытталады», - деп нақтылады Қуантыров.

Оның айтуынша, республикалық бюджет шығыстарын түзетілген көлемге қатысты 2,7 трлн. теңгеге ұлғайта отырып, 18,8 трлн. теңге көлемінде айқындау ұсынылады.

• 06.05.2022
• 312