ҚР ҰЭМ мен Азия даму банкі өңірлік ынтымақтастық мәселелерін талқылады

Ұлттық экономика вице-министрі, Орталық Азия өңірлік экономикалық ынтымақтастығы бағдарламасының Қазақстаннан Ұлттық үйлестірушісі Абзал Әбдікәрімов АДБ Орталық және Батыс Азия департаментінің өңірлік ынтымақтастық және операцияларды үйлестіру бөлімінің директоры Ләзиза Сабыровамен кездесті.

Тараптар сауда, көлік, логистика және энергетика саласындағы ынтымақтастық мәселелерін талқылады.

«Қазақстан Азия даму банкі аясында жүзеге асырылып жатқан бірқатар өңірлік экономикалық дәліздер жолында орналасқан. Іске асыру жоспарланып отырған Халықаралық өнеркәсіптік кооперация орталығының жобасы дамуға жаңа серпін береді. Біз бұл орталық жүк ағыны мен инвестициялардың өсуін,
сондай-ақ жаңа нарықтарға шығуды қамтамасыз ететініне сенімдіміз», - деп атап өтті Әбдікәрімов.

Сонымен қатар, Ұлттық экономика вице-министрі өзара іс-қимылды жақсарту бойынша бірқатар ұсыныстар енгізді.

Мәселен, бәсекеге қабілеттілікті ілгерілету, жұмыс орындарын құру және еңбек мигранттары үшін мүмкіндіктерді кеңейту мақсатында ОАӨЭЫ білім беру және біліктілікті арттыру саласындағы өңірлік бастамаларды қолдау мүмкіндігін қарастыра алады.

«Мысалы, мүше елдерде біліктілік стандарттарын, техникалық және кәсіптік білім беру, оқытушыларды даярлау саласындағы жалпы стандарттарды өзара тану, сондай-ақ университеттер мен басқа да жоғары оқу орындары арасындағы ынтымақтастықты дамыту. Біз осы бағыттағы жұмысты жандандыруымыз керек», - деді ол.

• 06.05.2022
• 311