Маңғыстауда ҚР Қарулы күштерінің 30 жылдығына арналған салтанатты шара өтті

6 мамыр күні облыс әкімі Нұрлан Ноғаевтың қатысуымен Отан Қорғаушылар күні және Қазақстан Республикасы Қарулы күштерінің 30 жылдығына арналған салтанатты  шара өтті, деп хабарлайды Маңғыстау облысы әкімінің баспасөз қызметі. 

Биыл Қазақстан Республикасы Қарулы Күштерінің құрылғанына 30 жыл толып отыр. Тәуелсіздігіміз бен тұтастығымызды, ел тыныштығын сақтауда әскери сарбаздардың атқарып жатқан қызметтері ұшан-теңіз. 

Салтанатты шарада аймақ басшысы барлық маңғыстаулықты және әскери қызметкерлерді айтулы мерекемен құттықтады. 

-Баршаңызды 7 мамыр – Отан қорғаушылар күнімен шын жүректен құттықтаймын! Еліміз тәуелсіздік алғалы, осы 30 жыл ішінде әскери қызметкерлеріміз жеріміздің тыныштығын қас қақпай күзетіп келеді. Мемлекет басшысы Қасым-Жомарт Тоқаев әрбір қазақстандықтың қауіпсіздігін көздің қарашығындай сақтап, ел шебін сенімді күзетіп жүрген сарбаздарымыздың әлеуметтік-тұрмыстық жағдайын жақсартуға көп көңіл бөліп отыр. Өйткені, сіздер Отанға қалтқысыз қызмет етіп келесіздер. Қай кезде де тәуелсіздік тұғырын биік ұстау, еліміздің өркендеу жолында табанды еңбек ету – басты парыз. Тәуелсіздігіміз бен тұтастығымыз, тыныштығымыз бен бейбіт өміріміздің кепілі – қуатты әскеріміз бен ұлттық Ұланымыздың абыройы асқақтай берсін! Ел іргесі бүтін, жұртымыз тыныш болсын!,-деді Нұрлан Ноғаев. 
 
Салтанатты шарада 7 мамыр – Отан Қорғаушылар күні және Қазақстан Республикасы Қарулы күштерінің 30 жылдығы аясында үздік қызметімен көзге түскен 60-тан аса әскери қызметкер марапатталды. 

Одан әрі мерекелік кеш маңғыстаулық өнерпаздардың концерттік шарасымен жалғасын тапты.

• 11.05.2022
• 140