Маңғыстауда “Қазақстан барысына” қатысушылар анықталды

6 мамыр күні өңір басшысы Нұрлан Ноғаевтың қатысуымен “Халық” аренада “Маңғыстау барысы” турнирі өтті, деп хабарлайды Маңғыстау облысы әкімінің баспасөз қызметі. 

Тартысты додаға өңіріміздің барлық аудандарынан іріктелген 18 жастан асқан 90 келі салмақ дәрежесінен жоғары 17 балуан «Маңғыстау барысы» атағын алуға бақтарын сынауға келді. 

Сонымен қатар 2021 жылғы “Қазақстан барысына” Маңғыстау облысының атынан қатысқан 2 балуан - Нұрдаулет Жарылғапов пен Жасұланбек Таңатов осы жолы да облыстық турнирге ешқандай іріктеусіз қатысты. 

Аймақ басшысы дүбірлі додада бақ сынауға келген өңіріміздің балуандарына сәттілік тіледі. 

 – Қазақ күресі – халқымыздың дәстүрлі өнерінің бірі. Өңірімізде осындай деңгейдегі жарыстардың өткізілуі ұлттық спорт түрлерінің дамуына, Балуан Шолақ, Қажымұқан сынды ұлы балуандардың жолын жалғастырушы спортшылардың көптеп шығуына серпін беруде. Бүгін барлығымыз Маңғыстаудың қарымды балуандарының сайысын тамашалап, нағыз мықтыны анықтауға жиналдық. Облысымыздан шыққан балуандардың жеңісіне куә боламыз деп сенемін!, - деді Нұрлан Ноғаев.

“Қазақстан барысы” турнирі 2011 жылдан бері жыл сайын өткізіліп келеді. Облыс деңгейінде өткізілетін “Маңғыстау барысы” да сол жылдан бастау алды.

Айта кетсек, өткен жылы 10 жылда алғаш рет Маңғыстау өңіріне “Қазақстан барысының” қола жүлдесі бұйырған болатын. Бұл жеңісті «Қара бура» лақап атымен танымал Нұрдаулет Жарылғапов алып келген еді. 

Осы жолы да бейнеулік Нұрдаулет Жарылғапов бірінші орынға ие болды. Екінші орынды Мұнайлы ауданының балуаны Нұрлан Қайыпбергенов қанжығасына байласа, ақтаулық Ақылбек Қуанышбаев үшінші орынды қанағат тұтты. 

Алдағы болатын “Қазақстан барысы” турниріне бірінші және екінші орынға ие болған балуандар жолдама алды.

• 11.05.2022
• 186