Түпқараған ауданында кинотеатр ашылды

Түпқараған ауданының орталығы Форт-Шевченко қаласында киноиндустрия саласының өрісін кеңейту мақсатында ұзақ жылдардағы үзілістен кейін, заманауи кинотеатр ашылды, деп хабарлайды облыстық Қоғамдық коммуникация орталығы. 

Түпқараған ауданы әкімдігі баспасөз қызметінің мәліметінше, кинотеатрды ашқан кәсіпкер 10 адамды тұрақты жұмыспен қамтымақ. Кинотеатр залында бір мезетте 200-ге жуық адам кино көре алады. 

Салтанатты шараға Форт-Шевченко қаласының тұрғындары, ардагерлер мен жастар қатысты. Жиында аудан әкімі Рахат Елтизаров халыққа мәдени рухани демалыс сыйлауға қызмет ететін нысанның ашылуымен құттықтап, кинотеатр жұмысына сәттілік тіледі.  

Жаңа кинотеатр лентасын Түпқараған ауданының құрметті азаматы Аманғали Күзембаев пен кино саласының ардагері Фабиян Жолдыбаева кесті. 

Кинотеатр ғимаратында кино залынан бөлек тұрғындар үшін барлық жағдай жасалған. Тамақтанатын орын мен күту залы да қарастырылған. 

Кинотеатрдың ашылу салтанатында биыл жарық көрген «Лето 1941 года» фильмі тегін көрсетіліп, кинотеатр қонақтарына сусындар таратылды. 

Айта кетсек, Форт-Шевченко қаласында 1954 жылы «Заря Манглишлака» атты кинотеатры болған. Бірақ оның қашан жабылғаны белгісіз.

• 11.05.2022
• 168