Ардақты ардагерлер, құрметті тыл еңбеккерлері! Қадірлі маңғыстаулықтар!

 Сіздерді 9 мамыр – Ұлы Жеңіс күні мерекесімен шын жүректен құттықтаймын! Бұл мереке – ерлік пен елдіктің рухы өрлеп, жеңіс жалауы желбіреген күн.  
 Отанды қорғау, елге абыроймен қызмет ету – қастерлі іс. Осынау жауапты сын сағатта ерлік көрсеткен ардагер аға буын мен тылда еңбек еткен аға-апаларымыздың еселі еңбегіне мың тағзым етеміз. 
 Кеуделерін оқ пен отқа тосып, қайсарлықпен күрескен бабаларымыздың батырлығы өскелең ұрпаққа үлгі-өнеге. 
Сондықтан, осынау ерлікке толы күн – жадымызда мәңгі сақталмақ.    
 Президент Қасым-Жомарт Кемелұлы Тоқаев «Аға буынның теңдессіз ерлігін құрметтеп, зұлмат соғыстың зардаптарын ұмытпау – біздің қастерлі борышымыз!» деп айтқан болатын. Бейбіт күнге жеткізген батырларымызға құрметіміз қашанда жоғары. Бүгінде облыс бойынша  Жеңістің 77 жылдығын қарсы алуға тағдыр жазып, ортамызда жүрген 6 соғыс ардагері, 578 тыл еңбеккері бар. Асыл текті қарияларымызға Маңғыстау халқының атынан алғысымызды айтамыз. Қадірлі ардагерлерімізді Жеңіс мерекесімен құттықтай отырып, зор денсаулық, ұзақ ғұмыр, отбасыларына бақ-береке тілеймін. Елімізде бейбітшіліктің аспаны әрдайым ашық, елдігіміз еңселі, тәуелсіздігіміз баянды болсын!
 
Құрметпен, Маңғыстау облысының әкімі Нұрлан Ноғаев

• 11.05.2022
• 163