Қарағанды облысында автомобиль шиналарын шығаратын зауытты салу туралы келіссөздер жүргізілді

"Татнефть" АҚ президенті Наиль Магановпен келіссөз жүргіздім. "Татнефть" шина өнімдерін өндіруде үлкен тәжірибесі бар Ресейдегі ең ірі мұнай-газ компанияларының бірі. "Татнефть" Саран қаласындағы автомобиль шиналары зауытын салу жобасы бойынша біздің серіктесіміз болып табылады.

Қазір бұрынғы РТИ зауытының жанынан құрылыс алаңы анықталып, инфрақұрылымды жүргізу жұмыстары басталды. Зауыт құрылысы келесі жылдың наурыз айында басталады. Сондай-ақ РТИ аумағында қосымша өзге де өндірістерді орналастыру қарастырылуда.

Жаңа зауытта біздің климаттық жағдайымыз ескеріле отырып, made in Kazakhstan шиналарының жаңа түрі шығарылатын болады. Өнім шығару екі жылдан кейін басталады деп жоспарлануда. 2025 жылға қарай жобалық қуаттылыққа қол жеткізіп, жылына 3 млн жеңіл автокөлік шинасы мен 0,5 млн жүк көліктеріне арналған шинаны шығару жоспарлануда. Өнім ішкі нарыққа және таяу шетел елдеріне экспортталатын болады.

Кәсіпорында 600-ге жуық жергілікті маман жұмыс істейді деп күтілуде. Ол үшін 200 үміткер маман жоба іске қосылғанға дейін Ресейдегі өндірісте екі жылдық оқудан өтеді.

Жалпы алғанда, "Татнефть" өкілдері аймақтың инвестициялық климатын жоғары бағалады.

Бұдан басқа, бұрынғы РТИ зауытының аумағында Yutong қытайлық компаниясымен бірлесіп жолаушылар автобустарын шығаратын жаңа зауыт салынып жатыр, ол осы жылдың соңында алғашқы өнімін шығарады.

Осы екі жаңа зауытпен бірге Саран қаласы үшін қала құраушы тұтас индустриялық аймақ қайта жаңғыратын болады.

Yutong-пен бірлескен зауыт жылына шамамен 1200 бірлік автобусты шығаруды жоспарлап отыр. Бұл Қазақстанның қоғамдық көлік паркін едәуір жаңартуға мүмкіндік береді.

Автобустар өндірісі әуел баста ірі тораптарды құрастырудан басталып, 2022 жылы біртіндеп ұсақ тораптарды жинақтауға ауысатын болады.

Бұдан басқа, Саран қаласындағы зауыт Қазақстанның өнеркәсіптік және тау-кен өндіруші компаниялары үшін жол-құрылыс және жүк техникасын шығаратын болады. Жылына 400-ге жуық арнайы техниканы шығару жоспарлануда.

Жобаларды іске қосу тағы 600-ге жуық жаңа жұмыс орнын ашуға мүмкіндік береді.

• 04.11.2020
• 451