Нұра ауданының тұрғындарымен кездесіп, жеке мәселелер бойынша қабылдау өткіздім

Тұрғындар әлеуметтік тұрғын үй беру, жолдарды жөндеу, елді-мекендерді абаттандыру, жайылымдық жерлердің жетіспеушілігі мәселелерін көтеруде. Өзекті мәселелердің қатарында электр энергиясының тарифі де бар. Бұл мәселе бойынша ТКШ басқармасына тұтынушылар тобы үшін тарифтерді саралауға өтінім беруді тапсырдым. Бұл халыққа қызмет көрсету құнын таяудағы айда 10% - ға төмендетуге мүмкіндік береді.

Ағымдағы жылы Нұра, Ахмет кенттерінде және Шұбаркөл, Байтуған, Егінді ауылдарында жолдарды орташа жөндеу көзделген. Бұдан басқа, облыстық маңызы бар Нұра – Шахтерское – Пржевальское автожолын қайта жаңарту жұмыстары жүргізілуде. Барлығы 20 км жол ретке келтіріледі.

Жанбөбек ауылында биыл сумен жабдықтау желілерін қайта жаңартуды аяқтаймыз. Аудан орталығында төрт балалар алаңын абаттандырып, орталық кітапхананы күрделі жөндеуден өткіземіз. Ауданда жеті ауылдық мәдениет үйі жөнделеді.

Тұрғындар көтерген мәселелер шешілетін болады. Бұл үшін барлық ресурстар мен мүмкіндіктерді пайдаланатын боламыз.

Нұра тұрғындары қойған кейбір сұрақтар бойынша тексеру жүргіземіз. Бұл Нұра ауданындағы тұрғын үйлер мен спорт нысандарының құрылысына қатысты. Оларды тапсыру мерзімін бұзғаны үшін кінәлілерге тиісті жазалау шаралары қолданылады.

• 19.05.2022
• 318