Қазақстанда этномедиация жүйесін дамытудың негізі қаланды

А.ж. 25 мамырда Қазақстан халқы Ассамблеясы төрағасының орынбасары – ҚХА хатшылығының меңгерушісі М. Әзілхановтың төрағалығымен мемлекеттік органдар мен медиаторлар қоғамдастығының қатысуымен ҚХА республикалық Медиация кеңесінің отырысы өтті.

Кездесу барысында Мемлекет басшысы, Қазақстан халқы Ассамблеясының Төрағасы Қ. Тоқаевтың еліміздегі этномедиация институтын дамыту жөніндегі тапсырмаларын іске асыру мәселелері талқыланды.

 «Медиацияның дамуы, яғни даулы және жанжалды жағдайларды шешу барысында азаматтардың ымыраға келуге дайындығы қоғамдық сананы жаңғыртудың маңызды белгілерінің бірі болып табылады», – деп атап өтті Марат Әзілханов.

Оның айтуынша, қазіргі уақытта күн тәртібінде этномедиаторларды дайындау жүйесін құру және қызметтік міндеттеріне байланысты осы салада жұмыс істейтін адамдарды тиісті дағдыларға үйрету міндеті тұр.     М. Әзілханов бұл бағытта нақты жұмыстар жүргізіліп, оқу бағдарламасы әзірленіп, алғашқы пилоттық курс өткізілгенін атап өтті. Сонымен қатар, оның пікірінше, бұл бағыттағы жұмысты күшейту қажеттілігі бар.

Кеңестің негізгі мәселелерінің бірі Этномедитация оқу орталығын құру, этномедиация курстарын және этносаралық қатынастар саласындағы кәсіби келіссөз жүргізушілердің оқуын ұйымдастыру болды.

Осы тұрғыда қойылған міндеттерді сапалы және кешенді іске асырудың негізгі тәсілдерін әзірлеу қажеттілігі талқыланды. Сондай-ақ, өңірлерде Достық үйлері мен медиация кабинеттері базасында халық үшін тоқсан сайынғы ашық есік күндерін өткізу қажеттілігі нақтыланды.

• 26.05.2022
• 277