2022 жылы Маңғыстауда 7562 түлек мектеп бітірді

Бүгін, 25 мамырда өңір басшысы Нұрлан Ноғаев Түпқараған ауданы Ақшұқыр мектеп-лицейінде өткен соңғы қоңырау мерекесіне арналған салтанатты шараға қатысты, деп хабарлайды Маңғыстау облысы әкімінің баспасөз қызметі.

Нұрлан Ноғаев ұстаздар қауымы мен мектеп оқушыларын, ата-аналарды бүгінгі мерекелерімен құттықтап, түлектерге сәт сапар тіледі.

– -Бүгінгі күн – бәріміз үшін, әсіресе ұстаздар қауымы, ата-аналар және мектеп бітіруші түлектер үшін аса маңызды. Кеше ғана әліппенің бетін ашып, қолға қалам ұстаған балауса балғындар бүгін мектептерімен қоштасып, үлкен өмірге қадам басқалы отыр. Мектеп – жақсылық пен ізгіліктің, парасаттылық пен руханияттың, таным мен тәрбиенің ордасы. Мемлекет басшысы Қасым-Жомарт Тоқаев Қазақстан халқына жасаған мәлімдемесінде: «Еліміздің алдында тұрған басты міндеттердің бірі – салауатты, саналы, білімді, ақыл-парасаты мол және ғылыми-мәдени өрісі кең ұрпақ тәрбиелеу», - деген болатын. 
Сіздердің білім ошағының қабырғасынан алған білімдеріңізбен, тәлім- тәжірибелеріңізбен қасиетті Маңғыстау өңіріне, бүкіл Қазақстанның жарқын болашағына өз үлестеріңізді  қосады деген сенімдемін!, - деді Нұрлан Ноғаев.

Биыл Маңғыстау облысында 167 385 оқушы, оның ішінде 12 500 тоғызыншы, 7 562 он бірінші сынып оқушылары үшін соңғы қоңырау соғылды.
 Түлектердің арасында «Алтын белгіге» 183, үздік аттестатқа 400-ге жуық үміткер бар.

• 26.05.2022
• 255