Маңғыстауда 2022 жылдың басынан бері 232 жүргізуші көлік жүргізу куәлігінен айырылды

Бүгін, 26 мамырда өңір басшысының төрағалығымен құқық бұзушылықтың алдын алу жөніндегі ведомствоаралық комиссияның отырысы өтті, деп хабарлайды Маңғыстау облысы әкімінің баспасөз қызметі.

 Жиынға облыстық мәслихаттың депутаттары, қоғамдық кеңес мүшелері, мемлекеттік органдардың өкілдері, қала, аудан әкімдері, т.б. қатысты. 

Отырыста «Қауіпсіздікті қамтамасыз етудің сервистік тәсілдерін енгізу» жобасын іске асыру, жол қозғалысы қауіпсіздігін қамтамасыз ету, жолдардың инфрақұрылымын жақсарту, сондай-ақ заманауи интеллектуалды бейнебақылау жүйелерін енгізу мәселелері талқыланды.

Жиын барысында Маңғыстау облысы полиция департаментінің бастығы Аян Дүйсембаев осы жылы атқарылған жұмыстарды баяндап, өзекті мәселелерге тоқталды.

Ағымдағы жылдың 4 айында 42 900 құқық бұзушылық анықталып, құқық бұзғандарға 300 миллион теңге көлемінде әкімшілік айыппұл салынған. 

Соның ішінде жол қозғалысы ережесін бұзғаны үшін көлік жүргізушілері 218 миллион көлемінде әкімшілік айыппұл арқалаған. Сонымен қатар 232 жүргізуші көлік құралын басқару құқығынан айырылып, әкімшілік қамауға алынған. 

Бүгінгі таңда облыста жол қозғалысы ережелерін бұзу фактілерін автоматты түрде есепке алатын 19 техникалық құрал жұмыс істейді (Ақтау қаласында – 16; Жаңаөзен қаласында – 3).

Аймақ басшысы Нұрлан Ноғаев өз кезегінде жауапты тұлғаларға елді мекендер арасындағы жолдарға интеллектуалды бейнебақылау жүйесін енгізуді жеделдетуді тапсырды.

Жиын соңында облыс әкімі жауапты тұлғаларға бірқатар тапсырмалар жүктеді.

• 27.05.2022
• 200