Газға қосылу қазақстандықтар үшін қол жетімді болады

Газға қосылу үшін техникалық шарттарды алу қол жетімді және тез рәсім болмақ. Бұл жөнінде Zakon.kz тілшісіне ҚР ҰЭМ Табиғи монополияларды реттеу комитетінің  төрағасы Асан Дарбаев хабарлады. Қазақстанда, әсіресе орталық және солтүстік өңірлерде газдандыру толық қарқынмен жүріп жатыр. Шын мәнінде орталық газбен жабдықтауға қосылуға техникалық шарттарды алу үшін қазір сегіз түрлі құжат жинау керек. Ол қосылуды ұзақ уақытқа созбақ.

ҚР ҰЭМ Табиғи монополияларды реттеу комитетінің  төрағасы Асан Дарбаевтың айтуынша жақын арада тұтынушы газға қосылуға техникалық шарттарды алу үшін бар болғаны төрт құжат керек болады, атап айтқанда:

• объект иесінің жеке басын куәландыратын құжаттың көшірмесі (жеке тұлғалар үшін), куәліктің көшірмесі немесе қызметтің басталғаны туралы хабарламаның көшірмесі (жеке кәсіпкер үшін), заңды тұлғалар үшін – мемлекеттік тіркеу (қайта тіркеу) туралы анықтама;
•  жер учаскесіне тіркелген құқықтар (ауыртпалықтар) туралы мәліметтер немесе жер учаскесіне құқық белгілейтін құжаттар;
• нысанның орналасу сызбасы;
• заңды тұлғалар үшін – көп қабатты үйлерді газдандыру кезінде тамақ дайындауға, жылытуға, желдетуге, ауа баптауға, ыстық сумен жабдықтауға шикі газды тұтынуға арналған гидравликалық есептер.

«Біз техникалық шарттарды алу рәсімін оңайлату бөлігінде тиісті құқықтық актілерге өзгерістер енгізу бойынша жұмыс жүргізудеміз. Жоғарыда аталған өзгерістер барлығына газға қосылу барысында техникалық шарттар алған кезде құжаттар санын жартысына қысқартуға мүмкіндік береді. Бұл шара көптеген адамдарға жеңілдетілген тәртіппен техникалық шарттар алуға және ағымдағы маусым барысында уақыт пен ақшаны үнемдей отырып, газға жылдам және қолжетімді қосылуға мүмкіндік береді, бұл халықтың газға тез көшуіне ықпал етеді». Асан Дарбаев

Өзгерістер «Табиғи монополиялар субъектілерінің қызметін жүзеге асыру қағидаларын бекіту туралы» Қазақстан Республикасы Ұлттық экономика министрінің 2019 жылғы 13 тамыздағы №73 және «Табиғи монополиялар субъектілері қызметкерлерінің іс-қимылдарының нақты тәртібімен қызметтер көрсетудің үлгілік регламенттерін бекіту туралы» 2021 жылғы 6 қаңтардағы №3 бұйрықтарына енгізілетін болады.

«Бұйрық жобасын жеке кәсіпкерлік субъектілерінің аккредиттелген бірлестіктерімен және мүдделі органдармен келісу жүріп жатыр». Асан Дарбаев

НҚА-ға өзгерістер енгізілгеннен кейін ведомство артық бюрократияны жойып қана қоймай, еліміздің газдандырылған өңірлерінің тұрғындарын газға қосуды ынталандыруды жоспарлап отыр.

• 31.05.2022
• 259