Маңғыстау облысы мәслихатының кезекті сессиясында 2021 жылға арналған бюджеттің орындалуы талқыланды

31 мамыр күні 7-ші сайланған облыстық мәслихаттың он екінші сессиясы өтті, деп хабарлайды Маңғыстау облысы әкімінің баспасөз қызметі.  

Сессия жұмысына мәслихат депутаттары, мемлекеттік органдардың басшылары қатысты.

Күн тәртібінде 10 мәселе қаралды. Соның ішінде 2021 жылға арналған облыстық бюджеттің атқарылуы туралы облыс әкімінің орынбасары Әлімұхаммед Құттымұратұлы баяндады.

2021 жылы халықты кепілдендірілген тегін медициналық көмекпен қамтамасыз етуге 250 млн.тенге бөлінді. Денсаулық сақтау ұйымдарының материалдық базасын нығайтуға 811 млн.тенге жұмсалды. 

Сонымен қатар халықтың әлеуметтік осал топтарын қолдау мақсатында 32 мың алушыға 2,1 млрд.теңге, сондай-ақ, атаулы күндерге 39 мың адамға 644 млн.теңге біржолғы көмек берілді.

Сондай-ақ мәдениет және спорт саласына 11 млрд.теңге бөлініп, нәтижесінде спортпен шұғылданатын балалар мен жасөспірімдер саны 6%-ға өсті. Үкіметпен қабылданған арнайы бағдарлама аясында жергілікті бюджет есебінен 6 мыңнан астам бала 127 түрлі шығармашылық үйірмеге, 4 800-ден астам бала спорттың 21 түріне тегін қатысуға мүмкіндік алды. 

Өткен жылы өңірде орын алған қуаңшылыққа байланысты төрт түлік малды жем-шөппен қамтамасыз ету және қыстық қор жасақтау үшін жергілікті әкімдік резервінен 2,1 млрд.теңгеге  7,3 мың тонна жем және 12,7 мың тонна шөп сатып алынды.

Сонымен қатар 733 шаруа қожалығы мен 6 716 жеке шаруашылықтың аналық мал басына жем-шөп сатып алу шығындарын өтеуге  Үкімет резервінен 1,2 млрд.теңге бөлінді.

Жиын соңында өңір басшысы Нұрлан Ноғаев депутаттардың бірлесіп жасаған нәтижелі жұмысы үшін алғысын білдіріп, Мемлекет басшысының  алға қойған міндеттері мен тапсырмалары негізінде облыста халықтың әл-ауқатын арттыру мақсатында ауқымды жұмыстар атқарылып жатқанын атап өттті.

• 01.06.2022
• 243