Маңғыстауда қоршаған ортаны қорғауға арналған халықаралық конференция басталды

Бүгін, 3 маусымда Дүниежүзілік қоршаған ортаны қорғау күні қарсаңында Қазақстанда жұмыс істейтін ірі кәсіпорындар мен халықаралық ұйымдар Маңғыстау облысында өндіріс орындарынан шығатын көмірқышқыл газын азайту жолдарын талқылады, деп хабарлайды Маңғыстау облысы әкімінің баспасөз қызметі.

Конференция экология, геология және табиғи ресурстар министрлігі БҰҰ Даму бағдарламасының қолдауымен ұйымдастырылды. 
 
Іс-шараға Қазақстан Республикасы Экология, геология және табиғи ресурстар министрі Серікқали Брекешев, Маңғыстау облысының әкімі Нұрлан Ноғаев, БҰҰДБ-ның Қазақстандағы Тұрақты өкілі Якуп Бериш, өнеркәсіп секторының өкілдері, халықаралық және ұлттық сарапшылар қатысты.
 
Қатысушылар энергия тиімділігін арттыру және қоршаған ортаға жүктемені азайту үшін озық технологиялық шешімдерімен, сондай-ақ «жасыл» жобаларды іске асыру аясында көміртегі мөлшерін азайту бойынша қазіргі мүмкіндіктермен танысты. 
 
Сондай-ақ «NCOC», «Теңізшевройл», «ERG», Павлодар мұнай-химия зауыты сияқты ірі кәсіпорындар экологиялық көрсеткіштерді жақсарту тәжірибесімен бөлісті. 

Шарада сөз алған ҚР Экология, геология және табиғи ресурстар министрі Серікқали Брекешев қоршаған ортаны қорғауда ең озық қолжетімді технологияларды қолданудың маңыздылығына тоқталды. 

-Өткен жылы уақыт талаптары мен халықаралық тәжірибені ескере отырып Экологиялық кодекс жаңартылды. Негізгі бағыттардың бірі - ең озық қолжетімді технологияларды енгізу, қоршаған орта сапасын нормалауға бағдар беру, үздік халықаралық тәжірибелер негізінде экологиялық талаптарды қатаңдату. Бүгінгі таңда әлемдік қоғамдастық ең озық қолжетімді технологияларды қолдануды негізге ала отырып, қоршаған ортаның ластануын болғызбау қағидатын ұстанады, – деді Серікқали Брекешев. 

Өз кезегінде аймақ басшысы Нұрлан Ноғаев талқыланған мәселелердің өңір үшін маңыздылығын атап өтті.

– Бүгінгі кездесу жаһандық мәселелерді талқылауға мүмкіндік беріп отыр. Біз прогресті тоқтата алмаймыз, бірақ ғылым мен техниканың барлық жетістіктерін қолдана отырып, қоршаған ортаға түсетін салмақты азайтып, өсімдіктер мен жануарлар дүниесін сақтай аламыз. Қоршаған ортаны қорғау – әрқайсымыздың басты міндетіміз. Бүгінгі таңда сарапшылар мен ұйымдар көрсеткен озық тәжірибелер біздің өңірдегі экологиялық жағдайды жақсартуға ықпал ететініне сенімдімін,-деді Нұрлан Ноғаев.

• 03.06.2022
• 274