Облыста әлеуметтік-экономикалық дамытудың 2025 жылға дейінгі кешенді дамыту жоспары аясында биыл 22 жоба жүзеге асырылуда.

Бүгін, 7 маусым күні облыс әкімі Нұрлан Ноғаевтың қатысуымен өткен аппарат жиынында құрылыс, сәулет және қала құрылысы, энергетика  басқармасының 2021-2025 жылдарға арналған әлеуметтік-экономикалық кешенді даму жоспарының орындалысы және тұрғын үй-коммуналдық шаруашылық мәселелері талқыланды, деп хабарлайды Маңғыстау облысы әкімінің баспасөз қызметі. 

Маңғыстау облысының құрылыс, сәулет және қала құрылысы басқармасы басшысының міндетін атқарушы Айнұр Манкешованың айтуынша өңірді әлеуметтік-экономикалық дамытудың кешенді жоспары аясында басқарма тарапынан 28 жобаны іске асыру жоспарлануда. Жобалар аясында 8595 – тұрақты, 4280 - уақытша жұмыс орындары құрылады деп күтілуде. Биылдың өзінде 22 жоба қолға алынған.

 Атап айтқанда, Түпқараған ауданының Форт-Шевченко қаласында жалға берілетін тұрғын үй салу және сатып алу жұмыстары бойынша 72 пәтерге арналған 3,9 мың шаршы метр тұрғын үйдің құрылысы 90%-ға  орындалған. Инженерлік желілер құрылысы аяқталғаннан кейін ағымдағы жылдың 3 тоқсанында пайдалануға беріледі. Одан бөлек Ақтау қаласындағы «Yessenov University» студенттері үшін 500 орындық жатақхана салу жұмыстары да кесте бойынша жүріп жатыр. 

 Энергетика және тұрғын үй-коммуналдық шаруашылық басқармасы тарапынан биылғы жылға 23 жоба қарастырылған. Оның ішінде 13 жоба бүгінгі таңда жүзеге асырылуда. 

-Қалалар мен аудандардағы тұрғын үйлерді жаңғырту бойынша 2022 жылға Жаңаөзен қаласы бойынша 22 көппәтерлі тұрғын үйге күрделі жөндеу жұмыстарын жүргізу мақсатында ағымдағы жылдың тамыз айында құрылыс жұмыстарын бастау жоспарлануда. Сәйкесінше күрделі жөндеуді талап ететін көп пәтерлі тұрғын үйлердің үлесі 16,83 %-дан 15,24 %–ға дейін төмендейді. Кендірлі ауылында қуаты тәулігіне 50 мың текше метр су тұщыту зауытын салу жоспарлануда. Сонымен қатар ауыз су өнімділігін арттыру бойынша Ақтау қаласындағы "Каспий" су тұщыту зауытын тәулігіне 40 мың текше метрге дейін кеңейту мақсатында құрылыс монтаждау жұмыстарының 60 % аяқталды. Одан бөлек қалаларда сумен жабдықтау және су бұру объектілерін салу да көзделіп отыр,-дейді Энергетика және тұрғын үй-коммуналдық шаруашылық басқармасының басшысы Бердібек Қартбаев.

Жиын соңында аймақ басшысы жауапты тұлғаларға халықтың әлеуетін арттыруға бағытталған жобалардың уақытында және сапалы жүзеге асуын қамтамасыз етуді тапсырды.

• 07.06.2022
• 351