Маңғыстауда Қазақстанның батыс өңірі ақсақалдарының форумы өтті

10 маусым күні Маңғыстау облысында Қазақстан мұсылмандары діни басқармасының бастамасымен “Қариялық - даналық пен өмір тәжірибесінің қайнар көзі” тақырыбында Қазақстанның батыс өңірі ақсақалдарының форумы өтті. 

Басқосуға Қазақстан мұсылмандары діни басқармасының төрағасы, Бас муфти Наурызбай қажы Тағанұлы, Атырау, Ақтөбе, Батыс Қазақстан облыстарының ел ағалары, облыс Бас имамдары және ақсақалдар кеңесінің мүшелері, облыс әкімі Нұрлан Ноғаев қатысты. 

Республикалық деңгейде ұйымдастырылған “Ақсақалдар форумы” елімізде биылғы жылдан бастап алғаш рет қолға алынып отыр. Бұдан бұрын Елорадамыз - Нұр-Сұлтан қаласында өткен форум, бүгін Маңғыстау облысында жалғасын тапты. 

Форум барысында ақсақалдар қоғамда орын алып жатқан түйінді мәселелер, ұрпақ тәрбиесі, ұлттық құндылықтардың қадір-қасиеті төңірегінде ой қозғап, ақыл-кеңестері мен пікірлерін ортаға салды. Форум - ақсақалдар кеңесінің жұмысын жүйелі түрде жүргізіп, қазақ халқының ертеден келе жатқан “Ақсақалдар институтына” серпін беруді көздейді.

-Қариясын сыйламайтын, жасы үлкенін қадірлемейтін қоғам - ешқашан өркениеттің биігіне көтеріле алған емес. Біздің халқымыз ар-ождан, қадір-құрмет, имандылық, әдеп-этика секілді құндылықтарды әбден қалыптастырған, қанға сіңіріп, санаға берік орнатқан.  Сондықтан өмірлік тәжірибесі мен даналығы мол аға ұрпақтың жастарды рухани жағынан тәрбиелеуде, бағыт-бағдар беруде маңызы зор. Әлі де жас ұрпаққа берер тәлім-тәрбиелеріңіз мол болсын! Сіздерге ұзақ ғұмыр, зор денсаулық, бақ-береке тілеймін!,-деді Нұрлан Ноғаев. 

Шара аяқталған соң форумға қатысушылар Бас мүфти Наурызбай қажы Тағанұлы және аймақ басшысы Нұрлан Ноғаевпен бірге 1200 орындық «Ержан хазірет» мешітінің ашылу салтанатына қатысты. Бұл Ақтау қаласындағы үшінші мешіт.

• 10.06.2022
• 340