Нұр-Сұлтанда шетелдік инвесторлар Кеңесінің 34-ші отырысы өтті

Бүгін ҚР Президенті Қасым-Жомарт Тоқаевтың төрағалығымен Шетелдік инвесторлар кеңесінің кезекті пленарлық отырысы өтті. Жиынға ірі трансұлттық компаниялардың басшылары, мемлекеттік органдардың жетекшілері және халықаралық ұйымдардың өкілдері қатысты. Отырыстың күн тәртібінде экономиканы көміртегінен арылту ісін дамыту және көміртегін аз пайдалану технологияларын енгізу мәселелері қарастырылды. Отырыс барысында Ұлттық экономика министрі баяндама жасады. Өз сөзінде ол климаттық күн тәртібінің жаһандық экономиканы дамытудағы маңыздылығын атап өтті. «2060 жылға қарай нөлдік шығарындыларға қол жеткізу бойынша міндеттемелер алған Қазақстан Париж келісімін жүзеге асыруда және тұрақты даму мақсаттарына қол жеткізуде посткеңестік елдері арасында жетекші рөл атқарады», - деп атап өтті Ә.Қуантыров. Сонымен қатар, көміртекті бейтараптыққа көшу Қазақстанның алдына климаттың өзгеру салдарына ішкі бейімделу және сыртқы климаттық шектеулердің күшеюіне ден қою секілді қиындықтар туғызады. ҰЭМ басшысының айтуынша, ауқымды өзгерістерді ескере отырып, 2060 жылға дейін ҚР көміртегі бейтараптығына қол жеткізу Стратегиясының жобасы әзірленді. Қазақстандық компаниялар СВАМ (трансшекаралық көміртекті реттеу тетігі) енгізуге белсенді түрде дайындалуда. Қазақстан экономиканы декарбонизациялауды ынталандыратын көміртекті реттеудің тұтас жүйесін құруды жалғастырады. «Көміртекті реттеу жүйесінің элементтері парниктік газдар шығарындыларына квоталар саудасының тиімді жүйесі, климаттық жобалар, «жасыл» қаржыландыру, таксономия, «жасыл» сатып алулар, ең озық қолжетімді техникалар, ESG бойынша бағалау мен есептілік болмақ», - деді ол. Көмірсутекті бейтараптыққа көшудің маңызды элементтерінің бірі ретінде ESG қағидаттарына ерекше назар аударылады. «Жасыл» жобаларға келетін болсақ, олар өзін-өзі қаржыландыру арқылы да, басқа елдерден инвестициялар тарту арқылы да іске асырылуы мүмкін. Сондықтан Қазақстан шетелдік инвесторлар үшін әрқашан ашық», - деп түйіндеді министр.

• 15.06.2022
• 418