Жаңаөзенде көпбейінді аурухана ашылды

Жаңаөзенде қаласында заманауи  көпбейінді аурухана пайдалануға берілді, деп хабарлайды Қоғамдық коммуникация орталығы Жаңаөзен қаласы әкімдігінің баспасөз қызметіне сілтеме жасап.

Аурухана 360 адамды қабылдауға қауқарлы. Озық үлгідегі медициналық-диагностикалық құралдармен жабдықталған. 

Салтанатты шараға Жаңаөзен қаласының әкімі Айбек Қосуақов, «ӨзенМұнайГаз» АҚ бас директоры Мақсат Ибағаров, дәрігерлер мен қала тұрғындары қатысты.

- Көпбейінді қалалық аурухана бұл медицина қызметкерлерінің кәсіби мерекесіне орай жасалған үлкен тарту. Құрметті дәрігерлер, осы сәтті пайдалана отырып, халық денсаулығын жақсарту жолындағы еңбектеріңіз үшін алғысымды білдіргім келеді. Толассыз қызметтеріңіздің өлшемінде қуанышымен қауышқан талай адамның тағдыры тұр. Жаңа заманауи аурухана халық игілігіне қызмет етсін, - деді Жаңаөзен қаласының әкімі Айбек Қосуақов.

Аурухананың лентасын қию құрметі медицина ғылымдарының кандидаты, ҚР денсаулық сақтау саласының үздігі, Жаңаөзен қаласында 40 жыл еңбек еткен медицина саласының ардагері Сүлеймен Бердаулетовке берілді.

• 15.06.2022
• 294