Ә.Қуантыров Өзбекстан Премьер-министрінің орынбасары - экономикалық даму және кедейлікті азайту министрімен кездесті

Бүгін Нұр-Сұлтанда ҚР Ұлттық экономика министрі Әлібек Қуантыров пен Өзбекстан Премьер-министрінің орынбасары - экономикалық даму және кедейлікті азайту министрі Джамшид Кучкаровтың кездесуі өтті. Тараптар екіжақты ынтымақтастық мәселелерін талқылап, одан әрі өзара іс-қимылдың перспективаларын белгіледі. ҰЭМ басшысы өзбек әріптесіне жылы лебізін білдіріп, екі елдің сауда-экономикалық байланыстарының жоғары деңгейін атап өтті. «Өзбекстан Қазақстанның Орталық Азия өңіріндегі негізгі әріптестерінің бірі болып табылады. Біз Түркі мемлекеттері ұйымы аясында да белсенді ынтымақтасамыз. Менің ойымша, тату көршілік қарым-қатынас тек нығая түседі. Біздің елдеріміздің экономикалық ынтымақтастықты тереңдету үшін үлкен әлеуеті бар», - деп атап өтті Ә.Қуантыров. Өз кезегінде, Джамшид Кучкаров қазіргі жағдайға қарамастан, Қазақстан экономикасы қарқынды дамып келе жатқанын атап өтті. «Өзбекстан Қазақстанның экономикалық реформаларын, оның ішінде жекешелендіру бойынша тәжірибесін зерделеуде. Бұл жұмысты біз жақында бастадық. Мемлекеттік-жекеменшік әріптестік саласында да тәжірибе алмасуға дайынбыз. Жалпы, біз тығыз қарым-қатынас орнатуға мүдделіміз», - деді Д.Кучкаров. Кездесу қорытындысы бойынша тараптар екі елдің Министрліктері арасындағы ынтымақтастық туралы Меморандумды жаңартуға келісті.

• 16.06.2022
• 360