Түркістанда Маңғыстау облысының мәдени күндері өз мәресіне жетті

Бүгін, 17 маусымда Түркістанда Маңғыстау облысының мәдени күндері жалғасын тапты, деп хабарлайды Маңғыстау облысы әкімінің баспасөз қызметі. 
  Екінші күн Маңғыстау және Түркістан облысы ақсақалдарының рухани кездесуімен басталды. 

Кездесуде ел ағалары қоғамда орын алып жатқан түйінді мәселелер, ұрпақ тәрбиесі, ұлттық құндылықтардың қадір-қасиеті төңірегінде  ой қозғап, ақыл-кеңестері мен пікірлерін ортаға салды.  

Жиында сөз алған Маңғыстау облысы әкімінің орынбасары Ұлықбек Тналиев алтынның сынығындай, бұлақтың тұнығындай қарияларымыз қай заманда да ұрпағын бейбіт те бақуатты тірлікті баянды етуге шақырып, адамгершілік пен ізгілікке, тәрбиелегенін атап өтті. 

  -Мемлекет басшысы Қасым-Жомарт
 Кемелұлы Тоқаевтың әділдікке, заң үстемдігі мен тең құқықтылыққа негізделген демокаратиялық ұстанымдары мен жаңғырған «Жаңа Қазақстан» құрудағы озық идеялары халқымыздың бойына жарқын болашаққа деген сенім ұялатып, жігерлендіріп, игі істерге жұмылдырып отыр.  Осынау аса маңызды, жауапкершілігі зор істе аузы дуалы, сөзі пәтуалы, дана қарттарымыздың атқарар ролі жоғары екені сөзсіз. Сондықтан ұлттық ұямыздың қайнар бұлағындай саналатын қастерлі тұлғалары – ақсақалдарға ұлан-ұрпақ, немере-шөберелер сеніммен қарайды. Сіздер айтқан даналықты ойлар мен парасатты сөздер, тағылымды әңгімелер жас өскіндерге жұғысты болады. Жаңа бағдарға бет бұрған қабырғалы Қазақ Қоғамының кемел келешекке, өзара татулыққа, ынтымақ пен ауызбіршілікке бастайтын шамшырағындай болып айқын жол көрсетіп жарқырап көш бастап жүре беріңіздер,-деді Маңғыстау облысы әкімінің орынбасары Ұлықбек Тналиев. 

Сонымен қатар шарада Қ.Сыдиықов атындағы Маңғыстау облыстық әмбебап кітапханасынан әкелінген өлкенің тарихы, мәдениеті кеңінен баяндалған ақын - жазушылардың 250-ге жуық кітабы таныстырылды. 

 Маңғыстау облысының өнім өндірушілерінің жәрмеңкесі өтті. Өңірден келген 15 кәсіпкер балық, тері өнімдерін, Маңғыстаудың тасынан, ағаштан, темірден жасалған бұйымдарды, ұлттық нақыштағы сәнді киімдерді, құрақ көрпелер және суретшілердің қолынан шыққан өнер туындыларын жұртшылыққа ұсынды.

Сонымен қатар, «Астана» спорт кешенінде жастар арасында Маңғыстау және Түркістан облысы командаларының шағын футболдан жолдастық кездесуі, Маңғыстау және Түркістан облысы аналар кеңесінің бірікккен шарасы ұйымдастырылды.  Кеңес аясында қазақтың ұлттық салт-дәстүрлері, соның ішінде Маңғыстау өңіріне тән Амал мерекесіне орай өтетін “Көрісу” дәстүрі дәріптелді.

Бұдан бөлек, Түркістанда Маңғыстау облысының күндері аясында ішкі туризмді дамыту және өңірдің туристік әлеуетін арттыру мақсатында дөңгелек үстел ұйымдастырылды. Дөңгелек үстел барысында Маңғыстау және Түркістан облыстарында ішкі туризмді дамытуға, сондай-ақ туризм саласында кадрлар даярлауға қатысты идеялар мен ұсыныстар айтылды. Кездесу соңында екі өңірдің туроператорлары арасында өзара ынтымақтастық туралы меморандум жасалды.

Түркістандағы Маңғыстау облысының күндері аясында Н.Жантөрин атындағы музыкалық драма театрының әртістері «Әлиханның аманаты» пьесасын қойды. 

Шығарманың авторы ҚР Мәдениет қайраткері Нартай Сауданбекұлы, қоюшы режиссёрі ҚР еңбек сіңірген қайраткері Гүлсина Мерғалиева. 

Бір жарым сағатқа созылған қойылым ұлт көсемі Әлихан бастаған Алаш зиялыларының асқақ рухына және Алаш Орданың 100 жылдығына арналған. Әлихан Бөкейханнан бөлек Ахмет Байтұрсынов, Міржақып Дулатов, Ілияс Жансүгіров, Бейімбет Майлин, Сұлтанмахмұт Торайғыров, Сәкен Сейфуллин секілді қазақ зиялыларының да образдары сомдалған.

  Маңғыстаудың мәдени күндері «Karavansaray Turkistan» туристік кешенінде елімізге белгілі әнші, Маңғыстаудың тумасы Тамара Асар және маңғыстаулық эстрада жұлдыздарының «Әнім саған, бағзы Тұран!» концерттік бағдарламасымен қорытындыланды.

• 20.06.2022
• 265