Бес айда Қазақстан экономикасының өсімі 4,6% құрады

Бүгін Премьер-министр Әлихан Смайыловтың төрағалығымен өткен Үкімет отырысында Ұлттық экономика министрі Әлібек Қуантыров 2022 жылғы қаңтар-мамыр айларындағы әлеуметтік-экономикалық даму қорытындысы туралы баяндады. ҰЭМ басшысы өз сөзінде Қазақстан экономикасының өсу қарқыны 4,6%-ды құрағаны туралы хабарлады. Осы есепті кезеңде негізгі трендтер бойынша қызмет көрсету секторындағы өсудің жеделдеуі, экспорт көлемінің жоғары өсуі байқалуда. «Нақты сектордағы өсім 4,8%-ды құрады. Қызмет көрсету саласында іскерлік белсенділік 3,9%-ға дейін ұлғайды», - деп нақтылады Ә.Қуантыров. Оның айтуынша, салалар арасында сауда, құрылыс, көлік және қоймалау, өңдеу өнеркәсібі, ақпарат және байланыс, тау-кен өедіру өнеркәсібі, сумен жабдықтау және ауыл шаруашылығы оң өсім көрсетуде. Негізгі капиталға салынған инвестициялардың өсу қарқыны 2,5%-ды құрады. Атап айтқанда, инвестициялар білім беруде – 71,1%-ға, мемлекеттік басқару; әлеуметтік қамсыздандыруда – 55,1%-ға, ғылыми және техникалық қызметте – 35,9%-ға, денсаулық сақтауда – 27,8%-ға, жылжымайтын мүлікпен операцияларда – 20,4%-ға, саудада – 13,9%-ға, құрылыс саласында– 10,7%-ға өсті. «Өңірлер арасында ең жоғарғы көрсеткіш Шымкент және Алматы қалаларында, сондай-ақ Ақмола облысында байқалуда», - деп атап өтті ведомство басшысы. Ұлттық экономика министрлігінің деректері бойынша, ағымдағы жылдың қаңтар-сәуірінде сыртқы сауда тауар айналымы 40,8%-ға өсіп, $39,7 млрд құрады, экспорт бойынша көрсеткіш $26 млрд-тан асып, 60%-ға өсті. Тауарлар импорты $13,2 млрд. құрады. Жалпы алғанда, оң сауда балансы $13,2 млрд дейін өсті. Өңдеу өнеркәсібі жоғары өсу қарқынын сақтап отыр. Өндіріс көлемі 5,3%-ға өсті. «16 өңір оң өсім көрсетті. Ең жоғарғы өсу Алматы қаласында, сондай-ақ Қостанай, Атырау және Шығыс Қазақстан облыстарында байқалуда», - деп атап өтті Ә.Қуантыров. Өңдеу өнеркәсібі салалары бойынша машина жасау өндірісі 9,9%-ға, оның ішінде автомобиль жасау – 22,8%-ға, компьютерлер, электронды және оптика құралдар жаасау – 17,3%-ға, құрылыс материалдары – 5,2%-ға, сусындар – 18,3%-ға, пластмасса бұйымдары – 11,4%-ға, дайын металл бұйымдары – 10,2%-ға, фармацевтика өнімдері – 4,7%-ға, киім өндірісі – 9,9%-ға жоғарылады. «Тау-кен өнеркәсібінде өндіріс көлемі 4,3%-ға артты. Салалар бөлінісінде өсім тау-кен өнеркәсібінде қызмет көрсетуде – 18,9%-ды, газ өндіруде – 6,3%-ды, шикі мұнай өндіруде – 4,7%-ды, көмір өндіруде – 2,2%-ды, металл кендерін өндіруде – 1,9%-ды құрады», - деп хабарлады ведомство басшысы. ▪️Ағымдағы жылдың қаңтар-мамыр айының қорытындысы бойынша тұрғын үйді пайдалануға беру 3,4%-ға өсіп, 4,7 млн. шаршы метрді құрады. Оң динамика 13 өңірде тіркелді. Ең жоғарғы көрсеткіштер Шымкент қаласында, сондай-ақ Түркістан, Алматы және Қызылорда облыстарында байқалуда. Ауыл шаруашылығында есепті кезеңде жалпы өнім шығару 1,3%-ға ұлғайды. «Барлық көрсеткіштер бойынша оң өсім 6 өңірде – Ақмола, Алматы, Қызылорда және Шығыс Қазақстан облыстарында, сондай-ақ Нұр-Сұлтан және Шымкент қалаларында байқалады», - деп түйіндеді министр.

• 21.06.2022
• 299