Маңғыстаудағы қоғамдық ұйымдар оқу орындарында әскери-патриоттық тәрбие беру жұмыстарын күшейтуді ұсынды

20 маусым күні Маңғыстау облысы әкімдігінде өткен жиында азаматтарды әскери қызметке шақыру, жастардыға патриоттық тәрбие беру мәселелері талқыланды. 

Кеңеске қоғамдық ұйымдардың, құқық қорғау және мемлекеттік органдардың өкілдері, ардагерлер қатысты.

Облыстық «Таулы Қарабахтағы ұлтаралық қақтығыстарды реттеудегі әскери қимылдардың ардагерлері» қоғамдық бірлестігінің төрағасы Әбдірашит Нияз өз сөзінде жастардың Отанды қорғауға деген патриоттық сезімдерін мектеп жасынан бастап дамыту қажет екенін атап өтті.

- Патриоттық тәрбиеде -мектеп пен отбасы үлкен рөл атқарады. Менің замандастарым, бізден кейінгі ізімізден ерген інілерім әскерде қызмет етіп, Отан алдындағы борышын адал атқарды. Осының барлығы - бізге бала кезімізден берілген тәрбиенің жемісі. Сондықтан әскери қызмет, Отанды қорғау-әрбір азаматтың қасиетті міндеті, - деді Әбдірашит Мұқырұлы. 

«Қарулы Күштерінің ардагерлері» Республикалық қоғамдық бірлестігінің Маңғыстау облыстық филиалының төрағасы, құрметті ардагер Нұрлыбай Қонақбаев жастардың өз еркімен әскер қатарына баруға деген ынтасын арттыру мақсатында бірқатар жүйелі ұсыныстарын ортаға салды. 

Сондай-ақ, қоғамдық ұйымдардың өкілдері "Алғашқы әскери дайындық" кабинеттерінің материалдық-техникалық базасын жақсарту және оқу орындарында балаларды әскери-патриоттық тәрбиелеуді ұйымдастыру бойынша жұмыстарды күшейту туралы ұсыныс айтты. 

 Кеңес қорытындысы бойынша өңір басшысы жауапты тұлғаларға бірқатар нақты тапсырмалар беріп, әскерге шақырылушылардың әскери қызметін өтеу кезінде қауіпсіздігін қамтамасыз ету жөніндегі жұмысты күшейту, олардың ата-аналарымен тұрақты түсіндіру жұмыстарын жүргізу қажеттігін атап өтті.

• 24.06.2022
• 291