Ақтөбелік дәрігерлер «Құрмет» орденіне ие болды

Қазақстан Республикасының Президенті Қасым-Жомарт Тоқаевтың жарлығына сәйкес Ақтөбе облысының әкімі Оңдасын Оразалин екі ақтөбелік дәрігерге мемлекеттік марапаттарын табыс етті. Атап айтқанда, отандық медицинаны дамытуға сүбелі үлес қосқан және азаматтардың өмірін сақтап қалуға аянбай еңбек еткен жедел медициналық жәрдем беру қызметінің дәрігері Мақсот Еркебаев пен №2 қалалық емхананың дәрігері Орындық Қаракүшікова «Құрмет» орденін иеленді.

Сондай-ақ, Ақтөбе облысының бірқатар мемлекеттік қызметкері кәсіби мерекелеріне орай облыс әкімінің алғыс хаттарымен марапатталды. Экономика және бюджетті жоспарлау басқармасы басшысының орынбасары Айгүл Ерғалиеваға «Үздік​ мемлекеттік​ қызметші» төсбелгісі, Ауыл шаруашылығы басқармасы басшысының орынбасары Асылхан Әбтиевке, Жұмыспен қамтуды үйлестіру және әлеуметтік бағдарламалар бөлімінің басшысы Роза Әленоваға «Облысқа сіңірген еңбегі үшін» медальдары тағылды.

Облыс әкімі өңірдің барлық мемлекеттік қызметкерлерін кәсіби мерекелерімен құттықтап, еңбектеріне табыс тілей отыра облыстың дамуы, тұрғындардың әл-ауқаты мен тұрмыс сапасы олардың кәсібиліктері мен ынталарына байланысты екенін еске салды.

• 24.06.2022
• 326