Үкімет 2026 жылға дейінгі Инвестициялық саясат тұжырымдамасын бекітті

Бүгін Премьер-Министр Әлихан Смайыловтың төрағалығымен өткен Үкімет отырысында Ұлттық экономика бірінші вице-министрі Тимур Жақсылықов Ұлттық экономика министрлігі мемлекеттік органдармен және Дүниежүзілік банкпен бірлесіп әзірлеген ҚР 2026 жылға дейінгі Инвестициялық саясат тұжырымдамасының жобасын таныстырды. Құжатта көзделген басты нысаналы индикаторлар - негізгі капиталға инвестициялар деңгейін ЖІӨ-ге 25,1%-ға дейін жеткізу және тікелей шетелдік инвестициялар ағынын 2026 жылы $25,5 млрд-қа дейін арттыру. Осы мақсаттарға қол жеткізу үшін Тұжырымдама жобасы инвестициялар тарту саясатын қайта қарау жөніндегі шаралар кешенін көздейді. «Өңдеу өнеркәсіп бәсекеге қабілеттілікті арттырудың түйінді драйвері болмақ. Әсіресе еңбек өнімділігінің өсуіне, экспорттың көлемін ұлғайтуға, жаңа өндірістерді игеруге және өндірісті кезең-кезеңімен оқшаулауға аса назар аударылады», - деді Т.Жақсылықов. Бұл ретте мемлекеттік қолдау жеке капиталдың жетіспеушілігі бар және ESG стандарттарының сақталуын көздейтін жоғары технологиялық және капиталды көп қажет ететін жобаларды іске асыру үшін көрсетілетін болады. Екінші маңызды драйвер – қызмет көрсету секторы. Мемлекеттің қатысуы әлеуметтік жобаларда басым болады. Шикізат секторы инвестициялар ағынының маңызды бағыты, сондай-ақ өңдеу өнеркәсібін дамыту үшін ресурстық база болып қала береді. Ұлттық экономика бірінші вице-министрінің айтуынша, Тұжырымдама жобасы негізгі үш бағыт бойынша құрылымдалған жүйелі сипаттағы 45 нақты іс-шарадан тұратын іс-қимыл жоспарын қамтиды. Бірінші бағыт ашық және болжамды инвестициялық саясатты қалыптастыруға бағытталатын инвестициялық экожүйені одан әрі дамытуды көздейді. «Осы бағыт шеңберінде құқықтық режимді жетілдіру, сот төрелігіне сенім мен ақпаратқа қол жеткізуді жақсарту, ведомствоаралық үйлестіруді нығайту, сондай-ақ жобалар мен өндірушілерді ілгерілетудің цифрлық құралдарын жасау арқылы инвесторлар үшін институционалдық орта мен инфрақұрылым жетілдірілетін болады», - деп түсіндірді ол. Екінші бағыт шеңберінде нарықтарға қолжетімділікті жақсарту үшін жеке сектордың инвестициялық белсенділігінің өсуіне жәрдемдесуге аса назар аударылады. Экономиканың инвестициялық әлеуетін ашу бойынша үшінші бағытты іске асыру үшін банкроттық рәсімдерін оңайлату, капиталдар ел экономикасына қайтарылған жағдайда оларға рақымшылық жасау және қазақстандық компанияларды шетелдік юрисдикциялар мен офшорлық аймақтардан АХҚО юрисдикциясына ауыстыру ұсынылады. «Жалпы тұжырымдама жаңа инвестициялық циклды қалыптастыруға және жаңа трендтерді ескере отырып, инвестициялар тарту саясатын қайта қарауға мүмкіндік береді. Нәтижесінде, ESG, жаһандық энергетикалық және технологиялық көшу талаптарын күшейту жағдайларында елдің тартымдылығын арттыруға бағытталған жүйелі шаралар іске асырылатын болады», - деп түйіндеді Т.Жақсылықов. 

• 29.06.2022
• 328