Сенат Салық кодексіне қатысты түзетулерді екі оқылымда мақұлдады

Бүгін ҚР Парламенті Сенатының пленарлық отырысы барысында Ұлттық экономика министрі Әлібек Қуантыров Салық кодексіне өзгерістер мен толықтырулар енгізу туралы Заң жобасын таныстырды. ҰЭМ басшысы өз сөзінде жоба Президенттің тапсырмаларын орындау, сондай-ақ салық салу мәселелері бойынша өзекті міндеттерді шешу мақсатында әзірленгенін атап өтті. «Заң жобасында биржалық металдар бойынша пайдалы қазбаларды өндіру салығы мөлшерлемелерін 50%-ға, қалған қатты пайдалы қазбалар бойынша 30%-ға ұлғайту көзделген. Бұл ретте өндіру 2022 жылғы 31 желтоқсаннан кейін басталатын жаңа кен орындарын 15% рентабельділік деңгейіне жеткенше 5 жыл мерзімге дейін пайдалы қазбаларды өндіру салығынан босату ұсынылады», - деп хабарлады министр. Ол атап өткендей, капиталды елден шығармауды ынталандыру мақсатында дивидендтер бойынша жеңілдіктерді қайта қарау ұсынылады. «Бейрезиденттер үшін барлық жеңілдіктер алып тасталады. Резиденттерді салықтан босату үшін 30 мың айлық есептік көрсеткіш шегі белгіленеді. Биржалық акциялар бойынша дивидендтер тұрақты сауда жүргізілген кезде босатылады. Өзара байланысты бейрезидент тұлғалардан алынған материалдық емес қызметтер бойынша шегерімдерді салық салынатын кірістің 3% мөлшерінде шектеу көзделген», - деп толықтырды ведомство басшысы. Сонымен қатар, темекі өнімдерінің басқа түрлері бойынша акциздерді кезең-кезеңімен ұлғайту ұсынылады. Қыздырылатын темекісі бар бұйымдарға акциз мөлшерлерін темекіге акциз мөлшерінен 70% деңгейінде белгілеу, сондай-ақ өлшем бірлігін килограмнан данаға өзгерту ұсынылады. Бұдан басқа, цифрлық майнингке, ауыл шаруашылығына, спутниктік байланысқа салық салу мәселелерін реттеу бойынша нормалар көзделген. 

• 29.06.2022
• 318