Жаңаөзен қаласында алғаш рет KWF кекушинкай каратэ-до спорт түрінен Азия чемпионаты өтеді

11 шілде күні Маңғыстау облысы әкімінің орынбасары Ұлықбек Тналиев жақында  тағайындалған ҚР KWF кекушинкай каратэ-до федерациясының президенті маңғыстаулық Мақсат Мұқашты қабылдады. Сонымен қатар, KWF кекушинкай каратэ-додан әлем кубогының күміс жүлдесін иеленген Шынтай Райымбек және жаттықтырушысы Берекет Нұрбаевты облыс әкімінің алғыс хатымен марапаттады.

ҚР KWF кекушинкай каратэ-до федерациясының президенті Мақсат Мұқаштың айтуынша, осы жылдың қыркүйек айының 24-26 күндері Жаңаөзен қаласында алғаш рет кекушинкай каратэ-додан Азия чемпионаты өтеді. Шараға Азия құрлығындағы 12 мемлекет қатысады.  

-Бұл – еліміз үшін де, облыс үшін де ауқымды шара болмақ.  Чемпионатқа Жапония, Корея, Қытай, Ирак, Иран, Сирия, Непал т.б мемлекеттерден спортшылар қатысады. Бұл ауқымды жоба – еліміздегі спорт саласының дамуына жаңа серпін береді деген ойдамыз,-деді Мақсат Мұқаш. 

Жуырда маңғыстаулық Шынтай Райымбек Испанияның Валенсия қаласында өткен «VI World Cup IFK Valencia» Әлем Кубогында  16-17 жас аралығында 65 келіге дейінгі салмақта қатысып, Әлем кубогының күміс жүлдегері  атанған болатын. Облыс әкімінің орынбасары Ұлықбек Тналиев жеңімпазды құттықтап, алдағы жоспарларына сәттілік тіледі.

Айта кетсек, елімізде  KWF кекушинкай каратэ-до федерациясы 2007 жылы  құрылған. Бүгінгі таңда федерацияда Республика бойынша 120-дан астам жаттықтырушы бар және 10 мыңға жуық оқушы тәлім алуда. Осы күнге дейін 300-ден астам оқушы «ҚР спорт шебері», ал 15 оқушы «Халықаралық дәрежедегі спорт шебері» атағын алып үлгерген. Соның ішінде Маңғыстау облысының спортшылары көш басында тұр.

• 12.07.2022
• 280