Белсенді ақтөбеліктер «Халық қатысатын бюджет» бойынша аулаларды абаттандыруда

Ақтөбенің Ағайынды Жұбановтар көшесіндегі бір аулада орналасқан бес үйдің тұрғындары ​ белсенді азаматтық позицияларының арқасында «Халық қатысатын бюджет» жобасына қатысып,аулаларын абаттандырып алды. Енді олардың ауласында тот басқан әткеншектері бар арамшөп басқан алаңқайдың орнында қоршалған футбол алаңы, воркаут алаңы және сыртта шұғылдануға болатын жаттығу құралдары бар заманауи үлкен спорт және ойын кешені тұр.

Облыс әкімі Оңдасын Оразалин абаттандыру жобасымен танысып шықты. 

«Біздің аулада бес үй бар. «Халық қатысатын бюджет» жобасына бастамалық еткен - 300/1 үйдің тұрғындары. Біз тапсырыс беріп, жобаны әзірледік, соған дауыс бердік. Енді бізде балаларға мотивация беретін аула бар. Бірақ біздің кешен тек балалар мен жастарды ғана қуантып қойған жоқ, зейнеткерлер мен орта жастағы кісілер де жаттығу құралдарына кезекке тұрып жатыр. Қолдау көрсеткеніңізге рахмет, бұл бағдарлама әрі қарай да жалғасын табады деп сенеміз»,- дейді ағайынды Жұбановтар көшесіндегі 300/1 үйдің кеңес мүшесі Жанар Есенжанова облыс әкімімен әңгімесінде.

«Алғысты осындай жобаларды жүзеге асыруда бірінші кезекте халықтың пікірін ескеруді тапсырған мемлекет басшысына айтқан жөн. «Халық қатысатын бюджет» азаматтардың шынайы қажеттіліктеріне жауап беруге мүмкіндік береді. Ақтөбеліктердің осы жобаға белсендірек қатысқандарын қалар едім»,- деді Оңдасын Оразалин.

• 14.07.2022
• 281