Ұлттық экономика вице-министрі А.Әбдікәрімов СОР26 өңірлік елшісімен климаттық күн тәртібіндегі мәселелерді талқылады

Нұр-Сұлтанда Ұлттық экономика вице-министрі Абзал Әбдікәрімов пен Еуропа, Орталық Азия, Түркия және Ирандағы COP26 өңірлік елшісі Дэвид Моранның кездесуі өтті. Іс-шараға Ұлыбританияның Қазақстандағы елшісі Кэти Личта қатысты. Тараптар климаттың күн тәртібі, төмен көміртекті экономиканы дамыту және "жасыл" жобаларды іске асыру мәселелерін талқылады, сондай-ақ одан әрі өзара іс-қимылдың перспективаларын белгіледі. Ұлттық экономика вице-министрі 2060 жылға қарай нөлдік шығарындыларға қол жеткізу бойынша міндеттемелерді өзіне алған Қазақстан, Париж келісімін ратификациялауда посткеңестік кеңістік елдері арасында жетекші орынға ие екенін еске салды. "КС26 (СОР26) Төрағасы ретіндегі Ұлыбританияның маңызды жұмысын ескере отырып, Қазақстан сіздің көміртекті бейтараптыққа көшу жөніндегі тәжірибеңізді, оның ішінде CBAM (Carbon Border Adjustment Mechanism) енгізуге бейімделу шараларын мұқият зерделеуге мүдделі", - деді А.Әбдікәрімов. Оның айтуынша, бүгінде экономиканы декарбонизациялауды ынталандыратын көміртекті реттеудің тұтас жүйесін құру бойынша белсенді жұмыс жүргізілуде. "Осы мақсатты іске асыру аясында ESG қағидаттарына ерекше көңіл бөлінеді. Отандық компаниялар осы стандарттарды белсенді енгізуде. Қазір біз әлемдік нарықтағы жағдайдың одан әрі дамуын мұқият қадағалап отырмыз және тиісті саясатты қалыптастыруда жаһандық климаттық күн тәртібінің үрдістерін ескеретін боламыз", - деп мәлімдеді вице-министр. А.Әбдікәрімов атап өткендей, "жасыл" жобалар дербес қаржыландыру арқылы да, басқа елдер мен халықаралық ұйымдардан инвестициялар тарту арқылы да іске асырылуы мүмкін. "Сондықтан Қазақстан осындай жобаларды жүзеге асыру бойынша шетелдік инвестицияларды және осы саладағы тәжірибе алмасуды құптайды", - деп мәлімдеді ол. Өз кезегінде, Дэвид Моран Қазақстанның осы бағыттағы жұмысын жоғары бағалап, климаттық күн тәртібі бойынша ынтымақтастықты одан әрі кеңейтуге дайындығын білдірді. 

• 14.07.2022
• 296